1 முதல் 9-ம் வகுப்பு வரை பயிலும் மாணவர்களுக்கு ஆண்டு இறுதித் தேர்வு கட்டாயம் நடைபெறும் என்று பள்ளிக் கல்வித்துறை அறிவித்துள்ளது.
தமிழ்நாட்டில் கொரோனா பரவல் காரணமாக சில காலம் நேரடி வகுப்புகள் தடை பட்டிருந்தாலும் கடந்த சில மாதங்களாக பள்ளிகள் வழக்கம் போல் செயல்பட்டு வருகின்றன. இரு ஆண்டுகளாக பொதுத் தேர்வுகளை நடத்தமுடியாத சூழல் நிலவிய நிலையில் இந்த ஆண்டு கட்டாயம் பொதுத் தேர்வுகள் நடைபெறும் என பள்ளிக் கல்வித்துறை திட்டவட்டமாக அறிவித்தது. கொரோனா காரணமாக பாடங்கள் குறைக்கப்பட்ட நிலையில் நீக்கப்பட்ட பாடங்களில் கேள்விகள் கேட்கப்படாது என தெளிவுபடுத்தப்பட்டது. அந்தவகையில் செய்முறைத் தேர்வுகள் தொடங்கி நடைபெற்று வருகின்றன. 10, 11, 12ஆம் வகுப்புகளுக்கான பொதுத் தேர்வு மே மாதம் முதல் வாரத்திலிருந்து மே இறுதி வரை நடைபெற உள்ளது.
இந்நிலையில் புதுச்சேரி அரசு 1 முதல் 9ஆம் வகுப்பு மாணவர்கள் தேர்வின்றி தேர்ச்சி பெறுவதாக அறிவித்தது. இதனால் தமிழ்நாட்டிலும் அத்தகைய அறிவிப்பு வெளியாகுமா என்ற எதிர்பார்ப்பு மாணவர்கள் மத்தியில் ஏற்பட்டது. இது தொடர்பாக பள்ளிக் கல்வித்துறை விளக்கமளித்துள்ளது. திட்டமிட்டபடி 1 முதல் 9ஆம் வகுப்பு மாணவர்களுக்கு ஆண்டு இறுதித் தேர்வு நடைபெறும் என பள்ளிக் கல்வித்துறை சார்பில் தெரிவிக்கப்பட்டுள்ளது. மே 6 முதல் மே 13ஆம் தேதிக்குள் இறுதித் தேர்வுகளை நடத்தி முடிக்க உத்தரவிடப்பட்டுள்ளது. குறைக்கப்பட்ட பாடத்திட்டத்தின் அடிப்படையில் இறுதித் தேர்வுகளுக்கான கேள்விகள் உருவாக்கப்படும் என தெரிவிக்கப்பட்டுள்ளது.