தலைநகர் டெல்லியில் அமைந்துள்ள ராஜபாதை இனி கர்த்தவ்யா பாத் (கடமை பாதை) என்று அழைக்கப்படும் என்று மத்திய அரசு தெரிவித்துள்ளது.
தலைநகர் டெல்லியின் அடையாளங்களில் ஒன்றாக ராஜபாதை விளங்குகிறது. குடியரசுத் தலைவர் மாளிகை முதல் நேதாஜி சிலை வரை அமைந்துள்ள இந்த பாதையில்தான் ஆண்டுதோறும் குடியரசு தினத்தின்போது முப்படைகளின் அணிவகுப்பு நடைபெறுவது வழக்கம். இத்தகைய சிறப்பு மிக்க ராஜபாதையில் பெயர் கடமை பாதை (கர்த்தவ்யா பாத்) என மாற்றப்படுவதாக மத்திய அரசு அறிவித்துள்ளது.
புதிய நாடாளுமன்ற கட்டிடம், மத்திய அரசு செயலகம், பிரதமர், துணை குடியரசுத் தலைவர் உள்ளி்ட்டோருக்கான குடியிருப்புகள் உள்ளிட்டவற்றை உள்ளடக்கியது சென்ட்ரல் விஸ்டா திட்டம். டெல்லி ராஜ பாதையில் முதல் இந்தியா கேட் வரையிலான ‘சென்ட்ரல் விஸ்டா’ திட்டம் முழுமையாக மறுவடிவமைக்கப்பட்டு தயாா் நிலையில் உள்ளது. இதனை வரும் 8 ஆம் தேதி பிரதமர் நரேந்திர மோடி திறந்து வைக்க உள்ள நிலையில், ராஜ பாதையின் பெயர் கடமை பாதை என மாற்றப்பட்டுள்ளது குறிப்பிடத்தக்கது.