அமெரிக்க பார்லிமென்ட் சபாநாயகர் நான்சி பெலோசியின் கணவர் பால் பெலோசியை மர்ம நபர் தாக்கியதால், அவர் மருத்துவமனையில் அனுமதிக்கப்பட்டுள்ளார்.
அமெரிக்க பார்லிமென்ட் சபாநாயகர் நான்சி பெலோசி, குடும்பத்தினருடன் சான் பிரான்சிஸ்கோவில் உள்ள தன் இல்லத்தில் வசித்து வருகிறார். இந்நிலையில், இவரது வீட்டுக்குள் புகுந்த மர்ம நபர், நான்சியின் கணவர் பால் பெலோசியை கடுமையாக தாக்கினார். இதில் அவர் படுகாயம் அடைந்தார். மருத்துவமனையில் அவருக்கு சிகிச்சை அளிக்கப்பட் வருகிறது. இந்த சம்பவத்தின் போது, நான்சி வீட்டில் இல்லை. தகவல் அறிந்து வந்த போலீசார், மர்ம நபரை பிடித்து விசாரித்து வருகின்றனர். அந்த மர்ம நபர் யார், எதற்காக பால் பெலோசியை தாக்கினார் என்ற விபரத்தை தெரிவிக்க போலீசார் மறுத்து விட்டனர்.
காயமடைந்து கீழே கிடந்த போது உதவியவர்களுக்கும், மருத்துவர்களுக்கும் சபாநாயகரும் அவரது குடும்பத்தினரும் நன்றி தெரிவித்துள்ளனர். அமெரிக்காவின் பலம் வாய்ந்த அரசியல் தலைவர்களில் ஒருவராக பெலோசி விளங்குகிறார். சமீபத்தில் சீனாவின் கடும் மிரட்டல், எச்சரிக்கையும் மீறி, தைவானுக்கு சென்று உலகளவில் பெரும் பரபரப்பை ஏற்படுத்தினார்.