சிசிடிவி காட்சியில் கோகுல்ராஜுடன் செல்வது நான் இல்லை என்று சுவாதி பரபரப்பாக கூறினார்.
சேலம் மாவட்டம் ஓமலுார் பொறியியல் பட்டதாரி கோகுல்ராஜ் (21). இவர் பட்டியல் சமூகத்தை சேர்ந்தவர். கடந்த 2015 ஆம் ஆண்டு ஜூன் 23 ஆம் தேதி தனது தோழியுடன் திருச்செங்கோடு கோயிலுக்கு சென்றுள்ளார். அப்போது, அங்கு வந்த மர்ம நபர்கள் கோகுல்ராஜை தாக்கி காருக்குள் ஏற்றி கொண்டு சென்றனர். இந்நிலையில், மகன் கடத்தப்பட்டதாக கூறி கோகுல்ராஜின் தாய் போலீசில் புகார் கொடுத்த நிலையில் ஜூன் 24 ஆம் தேதி தொட்டிபாளையம் ரயில்வே தண்டவாளத்தில் தலையின்றி கோகுல்ராஜின் சடலம் கண்டெடுக்கப்பட்டது. கோகுல்ராஜை கொலை செய்தவர்கள் தற்கொலையாக ஜோடிக்கவே இப்படி செய்தது மிக விரைவிலேயே தெரிய வந்தது. சம்பவத்தன்று கோகுல்ராஜியிடம் கோயிலில் பேசிக்கொண்டிருந்த பெண் பேசிய வீடியோ வழக்கை சூடு பிடிக்க வைத்தது.
அதற்கு பிறகு வெளியான ஆடியோவில் , நானும் கோகுல்ராஜும் காதலர்கள் இல்லை. வெறும் நண்பர்கள் மட்டுமே. கோகுலை கடத்தி சென்றவர்கள் காரில் ‘ தீரன் சின்னமலை பேரவை’ என எழுதியிருந்தது’ என கூறினார். பிறகுதான், கோகுலராஜை கடத்தியது தீரன் சின்னமலை பேரவை தலைவர் யுவராஜ் என்பது உறுதியானது. அவரை கடத்தி கொலை செய்து சடலத்தை தண்டவாளத்தில் போட்டு சென்றதும் அம்பலமானது. இந்த வழக்கில் 16 பேர் கைது செய்யப்பட்ட நிலையில் முக்கிய குற்றவாளி யுவராஜ் மட்டும் 100 நாட்களுக்கு மேலாக தலைமறைவாக இருந்தார். யுவராஜுக்கு போலீசில் பலரே பக்கபலமாக இருந்த நிலையில் பரபரப்பாக வீடியோக்களையும் வெளியிட்டு வந்தார்.
இதற்கிடையில், கோகுல்ராஜின் கொலை வழக்கை விசாரிக்க டிஎஸ்பி விஷ்ணுபிரியாவை விசாரணை அதிகாரியாக நீதிமன்றம் நியமித்தது. ஆனால், விஷ்ணுபிரியா அதே ஆண்டு செப்டம்பர் மாதம் 18-ந் தேதி காவலர் குடியிருப்பில் தூக்கிட்டு தற்கொலை செய்துகொண்டது மாநிலத்தை உலுக்கி எடுத்தது. யுவராஜ் சரணடையாமல் விஷ்ணுபிரியாவுக்கு போன் செய்து கொடுத்த தொல்லை, மேல் அதிகாரிகளால் கொடுக்கப்பட்ட அழுத்தம் விஷ்ணுபிரியாவை மிகுந்த மன உளைச்சலுக்கு தள்ளியது. அதுவே அவரது தற்கொலைக்கு காரணம் என்றும் பிறகு பேசப்பட்டது. நீதிமன்றமும் போதிய ஆதாரம் இல்லாததால் இந்த வழக்கை முடித்து வைத்தது.
இதனிடையே வெகு நாட்கள் கழித்து இவ்வழக்கில் தீரன் சின்னமலைக் கவுண்டர் பேரவை தலைவர் யுவராஜ் கைதானார். யுவராஜ் காவல் நிலையத்தில் சரணடைந்த போது, போலீசார் அவரை ஹீரோவாக பார்த்ததாகவும், மரியாதையாக வரவேற்றதாகவும் மூத்த காவல் அதிகாரி ஒருவர் ஆங்கில ஊடகத்திற்கு பேட்டி கொடுத்ததை நாம் நினைவு கூற வேண்டும். கைதான 17 பேரில் 2 பேர் மரணமடைந்துவிட்டனர். நாமக்கல் சிறப்பு நீதிமன்றத்தில் வழக்கு நிலுவையில் இருந்தது.கோகுல்ராஜின் தாய் சித்ரா, ‘விசாரணை வெளிப்படையாக நடக்கவில்லை. மிரட்டலுக்குப் பயந்து சிலர், பிறழ் சாட்சிகளாக மாறி விட்டனர். எனவே, வழக்கை வேறு மாவட்டத்துக்கு மாற்ற வேண்டும் என்று மனு தாக்கல் செய்தார். அதற்கு பிறகு இந்த வழக்கு மதுரை வன்கொடுமை தடுப்பு வழக்கு சிறப்பு நீதிமன்றத்திற்கு மாற்றப்பட்டது. விசாரணை நடைபெற்று வந்த நிலையில் கடந்த மார்ச் மாதம் தீர்ப்பை வாசித்த நீதிபதி சம்பத்குமார், கோகுல்ராஜ் கொலை வழக்கில் முதல் குற்றவாளியான யுவராஜுக்கு 3 ஆயுள் தண்டனை (42 வருடம்) விதிக்கப்படுவதாக அறிவித்தார். அதுபோல, இரண்டாவது குற்றவாளியான யுவராஜின் ஓட்டுநர் அருண் என்பவருக்கும் 3 ஆயுள் தண்டனை விதிக்கப்பட்டுள்ளது. இதர குற்றவாளிகளான குமார், சதீஷ்குமார், ரகு, ரஞ்சித், செல்வராஜ், ஆகிய 5 பேருக்கு 2 ஆயுள் தண்டனையும் பிரபு, கிரிதர் ஆகிய இருவருக்கு பிரபு, கிரிதருக்கு ஆயுள் தண்டனையுடன் கூடுதலாக 5 ஆண்டு கடுங்காவல் தண்டனையும் ரூ.5 ஆயிரம் அபராதமும், சந்திரசேகரனுக்கு ஒரு ஆயுள் தண்டனை விதிக்கப்பட்டது.
இந்த உத்தரவை ரத்து செய்யக்கோரி யுவராஜ், உள்ளிட்ட 10 பேரும் உயர்நீதிமன்ற மதுரைக் கிளையில் மனுக்களை தாக்கல் செய்துள்ளனர். முக்கியமாக கோகுல்ராஜின் கல்லூரி தோழி சுவாதி பிறழ் சாட்சியாக மாறிவிட்டார். இன்று மதுரை கோர்ட்டில் ஆஜராகி பிறழ் சாட்சியாக அளித்த வாக்குமூலத்தை நீதிமன்றம் முழுமனதாக ஏற்கவில்லை. ”கோகுல் ராஜ் பின்னணி குறித்து எனக்கு எதுவும் தெரியாது. சக மாணவர்களிடம் பேசுவது போலதான் கோகுலிடம் பேசுவேன். சம்பவம் நடந்த அன்று கோகுலை நான் பார்க்கவில்லை. குற்றவாளி யுவராஜ் பற்றி எனக்கு வழக்கிற்கு பிறகுதான் தெரியும். சிசிடிவியில் இருப்பது நான் இல்லை. ஆனால், கூட இருப்பது கோகுலை போல தெரிகிறது. முன்பு வெளியான ஆடியோ என்னுடைய குரல் அல்ல” என்று சுவாதி அடுத்தடுத்து கூறியது நீதிபதியின் கண்டனத்துக்கு ஆளானார்.
சுவாதியின் வாக்குமூலத்தை பதிவு செய்துகொண்ட நீதிபதி கூறுகையில், ”உங்களது புகைப்படத்தையே உங்களுக்கு தெரியவில்லை என கூறுவதெல்லாம் ஏற்புடையதல்ல. வாழ்க்கையில் முக்கியம் சத்தியமும், நியாயமும், தர்மமும்தான்; சாதி முக்கியமல்ல. நீங்கள் பேசியதாக கூறப்படும் ஆடியோவை சோதனைக்கு அனுப்பியுள்ளோம். அதில் உண்மை தெரிந்துவிடும். சத்தியம் என்றைக்கானாலும் சுடும். எத்தனை நாட்கள் உண்மையை மறைக்க முடியும். வரும் 30ஆம் தேதி மீண்டும் நீங்கள் ஆஜராக வேண்டும். அன்றைய தினமும் இதே நிலை தொடர்ந்தால், நீதிமன்ற அவமதிப்பு நடவடிக்கை எடுக்க நேரிடும் என நீதிபதிகள் எச்சரித்தபோது சுவாதி கண்ணீர்விட்டு அழுதார். சுவாதியின் வாக்குமூலத்தால் கோகுல்ராஜ் இரண்டாவது முறையாக கொல்லப்பட்டுள்ளதாக கூறும் அவரது ஆதரவாளர்கள், அடுத்த விசாரணையில் மர்மங்கள் வெளிப்படும் என்று கருத்து தெரிவிக்கின்றனர்.
இந்நிலையில் சுவாதியிடம், நீதிபதிகள் அடுக்கடுக்கான கேள்விகளைக் கேட்டுக்கொண்டிருந்த நிலையில், திடீரென சுவாதி மயங்கி விழுந்தார். உடனடியாக நீதிமன்ற வளாகத்தில் உள்ள மருத்துவமனையில் அனுமதிக்கப்பட்டார்.