அஜித்தின் ஏகே 62 படத்தில் இருந்து நடிகை த்ரிஷா நீக்கப்பட்டுள்ளதாக தகவல் வெளியாகி வருகிறது.
திரையுலகில் கடந்த 20 ஆண்டுகளுக்கும் மேலாக ஹீரோயினாக வலம் வருபவர் நடிகை த்ரிஷா. ரஜினி, கமல், அஜித், விஜய், சூர்யா, ஆர்யா, தனுஷ் என முன்னணி நடிகர்கள் பலருடனும் ஜோடியாக நடித்துள்ளார் த்ரிஷா. இதேபோல் தெலுங்கு சினிமாவிலும் டாப் நடிகர்களுக்கு ஜோடியாக நடித்து வருகிறார். பாலிவுட்டிலும் சில படங்களில் நடித்துள்ளார் த்ரிஷா.
இந்நிலையில் நடிகை த்ரிஷா மணிரத்னம் இயக்கத்தில் பொன்னியின் செல்வன் படத்தில் நடித்தார். இந்தப் படத்தில் குந்தவையாக நடித்த த்ரிஷாவின் கதாப்பாத்திரம் பெரிதும் பேசப்பட்டது. த்ரிஷாவின் சினிமா கெரியரில் இப்படம் முக்கியமான படம் என்றும் சொல்லப்பட்டது. பொன்னியின் செல்வன் படத்தில் த்ரிஷாவின் அழகும் பிரமிக்க வைத்தது. இதனைத் தொடர்ந்து 40 வயதிலும் த்ரிஷாவின் கெரியர் மளமளவென உயர்ந்தது. இப்படத்தின் வெற்றியை தொடர்ந்து த்ரிஷா தனது சம்பளத்தை பல மடங்கு உயர்த்தியதாகவும் கூறப்பட்டது. மேலும் விஜய் மற்றும் அஜித்தின் அடுத்தடுத்த படங்களிலும் நடிகை த்ரிஷா கமிட்டானதாக கூறப்பட்டது.
இந்நிலையில் அஜித்தின் ஏகே 62 படத்தில் இருந்து த்ரிஷா நீக்கப்பட்டுள்ளதாக கடந்த சில நாட்களாக தகவல் பரவி வருகிறது. துணிவு படத்தில் நடித்துக் கொண்டிருக்கும் போதே அஜித்தின் அடுத்தப் படத்தை விக்னேஷ் சிவன்தான் இயக்கவுள்ளார் என தகவல் பரவியது. இந்நிலையில் ஹெச் வினோத் இயக்கியுள்ள துணிவு படம் வரும் பொங்கல் பண்டிகைக்கு ரிலீஸ் ஆகவுள்ள நிலையில் ஏகே 62 படத்தின் அதிகாரப்பூர்வ அறிவிப்பு சமீபத்தில் வெளியானது. அதன்படி விக்னேஷ் சிவன் இயக்கும் ஏகே 62 படத்தை லைகா புரடெக்ஷன்ஸ் தயாரிக்கவுள்ளது என்றும் அனிருத்துதான் இப்படத்திற்கு இசையமைக்கவுள்ளார் என்றும் கூறப்பட்டது.
இந்நிலையில் இப்படத்தில் இருந்து த்ரிஷா நீக்கப்பட்டுள்ளதாக தகவல் வெளியாகியிருப்பது ரசிகளை அதிர்ச்சி அடைய செய்துள்ளது. மேலும் த்ரிஷா ஏகே 62 படத்தில் இருந்து நீக்கப்படுவதற்கு விக்னேஷ் சிவன் தான் காரணம் என்று தகவல் வெளியாகியுள்ளது. அதாவது விக்னேஷ் சிவன் இயக்கத்தில் வெளியான காத்துவாக்குல ரெண்டு காதல் படத்தில் சமந்தாவுக்கு பதில் த்ரிஷாவைதான் நடிக்க வைக்க திட்டமிட்டு ஒப்பந்தம் செய்தார்களாம். ஆனால் படக்குழுவினருடன் ஏற்பட்ட கருத்து வேறுபாட்டால் த்ரிஷா விலகியதாகவும், அதை மனதில் வைத்துதான் விக்னேஷ் சிவன் தற்போது த்ரிஷாவை நீக்கியதாகவும் தகவல் ஒன்று றெக்கை கட்டி பறக்கிறது.