பிரபல தெலுங்கு நடிகர் சுனில் ஜெயிலர் படத்தில் இணைந்தார்!

நெல்சன் திலீப்குமார் இயக்கத்தில் ரஜினி நடிக்கும் ‘ஜெயிலர்’ படத்தில் பிரபல நடிகர் சுனில் இணைந்துள்ளதாக அதிகாரப்பூர்வ அறிவிப்பு வெளியாகியுள்ளது.

சிறுத்தை சிவா இயக்கத்தில் ரஜினி நடிப்பில் கடைசியாக வெளியான ‘அண்ணாத்த’ படம் பலவித நெகட்டிவ் விமர்சனங்களை தாண்டி பாக்ஸ் ஆபிஸில் வசூல் சாதனை படைத்தது. ஆனாலும் ரஜினி ரசிகர்களுக்கு இந்தப்படம் திருப்தி அளிக்கவில்லை. இதனை தொடர்ந்து ரஜினியின் அடுத்த பட இயக்குனர்களின் பட்டியலில் பல இளம் இயக்குனர்களின் பெயர்கள் அடிப்பட்டது. இந்நிலையில் ‘ஜெயிலர்’ படத்தில் நடிக்க கமிட் ஆனார் ரஜினி. இந்தப்படத்தில் ரம்யா கிருஷ்ணன், யோகி பாபு, விநாயகன், வசந்த் ரவி ஆகியோர் நடிப்பதாக படக்குழு அதிகாரப்பூர்வ அறிவிப்பும் வெளியிட்டது. சன் பிக்சர்ஸ் தயாரிக்கும் இந்தப்படத்திற்கு அனிருத் இசையமைக்கிறார்..

கடந்த ஆகஸ்ட் 22 ஆம் தேதி துவங்கிய ‘ஜெயிலர்’ படப்பிடிப்பு விறுவிறுப்பாக நடைபெற்று வருகிறது. நெல்சனின் முந்தைய படங்களை விட ஜெயிலரில் ஆக்ஷன் காட்சிகள் அதிகமுள்ளதாகவும் கூறப்படுகிறது. இதனையடுத்து அண்மையில் இந்தப்படத்தில் பிரபல கன்னட நடிகர் சிவராஜ்குமார் இணைந்துள்ளதாக படக்குழுவினர் அதிகாரப்பூர்வ அறிவிப்பை வெளியிட்டனர்.

இந்நிலையில் பிரபல மலையாள நடிகர் மோகன்லால் ஜெயிலரில் சிறப்புத்தோற்றத்தில் நடிக்கவுள்ளதாக அறிவிப்பு வெளியானது. இதனையடுத்து தற்போது தெலுங்கு நடிகர் சுனில் ‘ஜெயிலர்’படத்தில் இணைந்துள்ளதாக சன் பிக்சர்ஸ் நிறுவனம் அதிகாரபூர்வமாக அறிவித்துள்ளது. 2021 ஆம் ஆண்டு வெளியான அல்லு அர்ஜூனின் ‘புஷ்பா’ படத்தில் சுனில் நடித்திருந்தது குறிப்பிடத்தக்கது.

மலையாளம், தெலுங்கு, கன்னடம் உள்ளிட்ட பிரபல நடிகர் ‘ஜெயிலர்’ படத்தில் இணைந்துள்ளது ரசிகர்கள் மத்தியில் எதிர்பார்ப்பை கிளப்பியுள்ளது. பான் இந்தியா படமாக ஜெயிலர் உருவாகும் என எதிபார்க்கப்படுகிறது. இந்தப்படத்தில் ரஜினி முத்துவேல் பாண்டியன் என்ற கதாபாத்திரத்தில் நடிப்பது குறிப்பிடத்தக்கது.