டெல்லி துணை முதல்வர் மணிஷ் சிசோடியாவை சிபிஐ கைது செய்தது.
தலைநகர் டெல்லியின் புதிய மதுபான கொள்கை அமல்படுத்தப்பட்டது. ஆனால் மதுபான வியாபாரிகளுக்கு உரிமம் வழங்கும் டெல்லி அரசின் கொள்கை, சில வியாபாரிகளுக்கு சாதகமாக இருப்பதாக குற்றம்சாட்டப்பட்டது. பல்வேறு சர்ச்சைகள் எழுந்த நிலையில் புதிய மதுபான கொள்கை திரும்ப பெறப்பட்டது. அதைத் தொடர்ந்து டெல்லி துணை முதல்வர் மற்றும் நிதி, கல்வித்துறை அமைச்சராக இருக்கும் மணிஷ் சிசோடியா மீது புதிய மதுபான கொள்கையில் ஊழல் நடந்ததாக அவரது வீடு உள்ளிட்ட 21 இடங்களில் சிபிஐ ரெய்டு நடத்தியது. அதையடுத்து மணீஷ் சிசோடியா மற்றும் 14 பேர் மீது கடந்த ஆண்டு ஆகஸ்ட் மாதம் சிறப்பு நீதிமன்றத்தில் சிபிஐ எப்ஐஆர் பதிவு செய்தது. இந்த வழக்கு விசாரணை தற்போது நடந்து வருகிறது. ஏற்கனவே இந்த வழக்கில் சிலர் கைது செய்யப்பட்டுள்ளது குறிப்பிடதக்கது.
இந்தநிலையில் மதுக்கொள்கை விவகாரம் தொடர்பாக கடந்த 19ம் தேதி, டெல்லியில் உள்ள மத்திய புலனாய்வுத் துறை (சிபிஐ) தலைமையகத்தில் காலை 11 மணிக்கு ஆஜராகும் படி சிபிஐ மணிஷ் சிசோடியாவிற்கு சம்மன் அனுப்பியது. ஆனால் மார்ச் மாதம் டெல்லி ப்டஜெட் கூட்டத்தொடர் நடக்க இருக்கிறது. எனவே அப்பணிகளில் வேலையாக இருப்பதால் தன்னால் ஆஜராகமுடியாது எனவே கால அவகாசம் வழங்குமாறு மணிஷ் சிசோடியா தெரிவித்தார். அதைத் தொடர்ந்து வருகிற 26ம் தேதி (நேற்று) ஆஜராகும் படி அவருக்கு மீண்டும் சம்மன் அனுப்பப்பட்டது.
இது குறித்து அவர் கூறும்போது, “சிபிஐ மீண்டும் என்னை விசாரணைக்கு அழைத்துள்ளது. ஒன்றிய அரசு எனக்கு எதிராக சிபிஐ, அமலாக்க துறை உள்ளிட்ட ஏஜென்சிகள் மூலம் முழு அதிகாரத்தையும் கட்டவிழ்த்துவிட்டனர். என் வீட்டில் சோதனை நடத்தினர், எனது வங்கி லாக்கரை சோதனை செய்தனர். ஆனால் இன்னும் எனக்கு எதிராக எந்த ஆதாரங்களும் கிடைக்கவில்லை. டெல்லியின் குழந்தைகளுக்கு நான் நல்ல கல்வியை ஏற்பாடு செய்துள்ளேன். அவர்கள் அதை நிறுத்த விரும்புகிறார்கள். விசாரணைக்கு நான் எப்போதும் ஒத்துழைத்து வருகிறேன், தொடர்ந்து செய்வேன். பாஜகவினர் என்னை பழிவாங்க வேண்டுமானால் கைது செய்ய முடியும், ஆனால் டெல்லி மக்களின் பட்ஜெட்டை தடுத்து நிறுத்த முடியாது. பாஜகவுக்கு சொந்த அரசியல் இருக்கலாம், ஆனால் சிபிஐ அதிகாரிகள் எனது கோரிக்கையை செவிசாய்ப்பார்கள் என்று நான் முழு நம்பிக்கையுடன் இருக்கிறேன்’’ என அவர் தெரிவித்தார்.
இந்தநிலையில் நேற்று காலை சிபிஐ அலுவலகத்தில் மணிஷ் சிசோடியா ஆஜரானார். சுமார் 9 மணி நேரம் நடந்த விசாரணைக்கு பிறகு அவர் கைது செய்யப்பட்டுள்ளார். இன்று காலை நீதிமன்றத்தில் ஆஜர்படுத்தப்படுவார் என சிபிஐ தெரிவித்துள்ளது.
அவரது கைதை கண்டித்து ஆம் ஆத்மி கட்சியினர் போராட்டத்தில் ஈடுபட்டுள்ளனர். ‘‘மணீஷ் சிசோடியா ஊழல்வாதி என்று பாஜக கூறி வருகிறது. ஆனால் நீங்கள் அவருடைய வீட்டில் இருந்தோ அல்லது வங்கிக் கணக்கிலோ எதையும் பெறவில்லை. அவர் மீதான குற்றச்சாட்டை அவர்களால் நிரூபிக்க முடியவில்லை. அவரது கைது ஆம் ஆத்மி மற்றும் கெஜ்ரிவாலின் புகழை தாக்கும் விஷயமாகும்’’ என்று ஆம் ஆத்மி தெரிவித்துள்ளது.
அதேபோல் டெல்லி முதல்வர் அரவிந்த் கெஜ்ரிவால் தனது டுவிட்டர் பதிவில், ‘‘மனிஷ் அப்பாவி. அவரது கைது ஒரு கேவலமான அரசியல். மணீஷ் கைது செய்யப்பட்டதால் மக்கள் மத்தியில் கடும் கோபம் ஏற்பட்டுள்ளது. எல்லோரும் பார்க்கிறார்கள். மக்கள் அனைத்தையும் புரிந்து கொண்டுள்ளனர். இதற்கு மக்கள் பதிலளிப்பார்கள். இது நமது உற்சாகத்தை மேலும் அதிகரிக்கும். நமது போராட்டம் வலுவடையும்’’ என்று தெரிவித்துள்ளார்.