கேரளாவில் ஓடும் ரயிலில் நடு இரவில் சக பயணி மீது சைக்கோ ஒருவன் பெட்ரோல் ஊற்றி தீ வைத்திருக்கிறான். இந்த கொடூர சம்பவத்தில் ஒரு வயதே ஆன பிஞ்சுக் குழந்தை உட்பட 3 பேர் உயிரிழந்துள்ளனர். 9 பேர் பலத்த தீக்காயத்துடன் மருத்துவமனையில் கவலைக்கிடமான நிலையில் அனுமதிக்கப்பட்டிருக்கிறார்கள்.
ரயில்களில் கொலை, கொள்ளை, பாலியல் பலாத்காரம் உள்ளிட்ட குற்றச்சம்பவங்கள் நிகழ்வது நம் நாட்டில் புதிதல்ல. இரண்டு மாதங்களுக்கு முன்பு கூட கேரளாவில் சக பயணியுடன் ஏற்பட்ட வாக்குவாதத்தில் அவரை மற்றொரு பயணி ஓடும் ரயிலில் இருந்து கீழே தள்ளிவிட்டார். அதில் அந்த நபர் ரயில் சக்கரத்தில் மாட்டி உயிரிழந்தார். அதேபோல, கடந்த 2011-ம் ஆண்டு நிகழ்ந்த ஒரு சம்பவம் நாட்டையே அதிர வைத்தது. அதுவும் கேரளாவில்தான் அரங்கேறியது. திருச்சூரில் ஓடும் ரயிலில் இருந்து கல்லூரி மாணவியை கீழே தள்ளிவிட்ட ஒரு மாற்றுத்திறனாளி நபர், பின்னர் தானும் ரயிலில் இருந்து குதித்து ரத்த வெள்ளத்தில் அந்தப் பெண்ணை பலாத்காரம் செய்தார். இதில் அந்தப் பெண் பரிதாபமாக உயிரிழந்தார்.
இந்த சூழலில், அதே கேரளாவில் தற்போது ஒரு கொடூர சம்பவம் அரங்கேறி இருக்கிறது. ஆலப்புழாவில் இருந்து கண்ணூரை நோக்கி எக்ஸ்பிரஸ் ரயில் ஒன்று நேற்று சென்று கொண்டிருந்தது. அப்போது இரவு 10 மணியளவில் அங்கிருந்த ஒரு பயணி, கழிவறைக்கு சென்றிருக்கிறார். அப்போது வழியை அடைத்துக் கொண்டு 35 வயது மதிக்கத்தக்க ஒரு இளைஞர் படுத்து சிகரெட் பிடித்துக் கொண்டிருந்ததாக கூறப்படுகிறது.
இதைப் பார்த்த அந்தப் பயணி, அவரிடம், “ஓடும் ரயிலில் சிகரெட் பிடிப்பது தவறு.. சிகரெட்டை வெளியே வீசுங்கள்” எனக் கூறியதாக தெரிகிறது. அப்போது அவர்களுக்கு இடையே வாக்குவாதம் ஏற்பட்டதாக கூறப்படுகிறது. அப்போது அந்த இளைஞர், தான் பாக்கெட்டில் வைத்திருந்த பெட்ரோலை எடுத்து அவர் மீது ஊற்றி தீ வைத்துள்ளார். இதில் உடல் முழுவதும் தீ பரவிய நிலையில், அவர் ரயிலில் அங்கும் இங்கும் அலறியடித்துக் கொண்டு ஓடியுள்ளார். வலி தாங்க முடியாமல் அங்கிருந்த சக பயணிகளை அவர் கட்டிப்பிடிக்கவே, அவர்கள் மீதும் தீப்பிடித்தது.
இவ்வாறு 1 வயது குழந்தை உட்பட 12 பயணிகள், உடலில் தீயுடன் கதறிய படி ரயிலுக்குள் ஓடிச் சென்றனர். சிலர் உடலில் தீயுடனே எங்கு போகிறோம் எனத் தெரியாம்ல ரயிலில் இருந்து வெளியே குதித்தனர். இந்த அசாதாரண சம்பவத்தை கண்ட மற்ற பயணிகளும் பயத்தில் ஓடினர். அபாயச் சங்கிலியும் இழுக்கப்பட்டது. பின்னர் ரயில் நிறுத்தப்பட்டு போலீஸார் அங்கு வருவதற்குள் பெட்ரோல் ஊற்றி தீ வைக்கப்பட்ட நபர், ஒரு வயது குழந்தை, ஒரு பெண் என 3 பேர் சம்பவ இடத்திலேயே உயிரிழந்தனர். 9 பேர் பலத்த தீக்காயமடைந்து உயிருக்கு போராடிக் கொண்டிருந்தனர். ரயில்வே போலீஸார் அவர்களை மீட்டு எலத்தூரில் உள்ள அரசு மருத்துவமனையில் அனுமதித்தனர். அவர்களில் பலரது நிலைமை கவலைக்கிடமாக இருப்பதாக மருத்துவமனை வட்டாரங்கள் தெரிவிக்கின்றன. இந்நிலையில், இந்த பயங்கரத்துக்கு காரணமாக இருந்த அந்த சைக்கோ கொலையாளி தப்பியோடிவிட்டதாக தெரிகிறது. இதையடுத்து, அவனை பிடிப்பதற்காக 10 தனிப்படைகளை கேரள காவல்துறை அமைத்து தேடி வருகிறது.
மேலும் எலத்தூர் ரயில் நிலையம் அருகே இருந்த சிசிடிவி காட்சிகளை போலீஸார் ஆய்வு செய்தனர். அப்போது அந்த நபர் கருப்பு சிகப்பில் சட்டையும் கருப்பு நிறத்தில் பேண்டும் அணிந்திருந்தார். மேலும் அவருடைய முதுகில் ஒரு பை மாட்டியிருந்தார். ஒரு இரு சக்கர வாகனம் வந்தது. அதில் அவர் தப்பி சென்றார். அதற்கு முன்னதாக யாருடனோ செல்போனில் பேசியபடியே நின்றிருந்தார். மேலும் அதே கோச்சில் அவருக்கு எதிரே அமர்ந்திருந்த ரஷீக் என்பவரின் உதவியுடன் போலீஸார் அந்த மர்மநபரின் வரைபடத்தை தயார் செய்து வந்தனர். இந்த நிலையில் அவருடைய படம் தற்போது வெளியாகியுள்ளது. அந்த புகைப்படத்தை வைத்து போலீஸார் தேடுதல் வேட்டையில் ஈடுபட்டு வருகிறார்கள். அந்த நபர் தலையில் கைக்குட்டை போல் அணிந்திருந்தார். லேசாக தாடியிருந்தது. அது போல் மார்பு பகுதியில் இருக்கும் முடிகள் கழுத்து வரை இருந்தது. அவர் ஒல்லியாக இருந்தார் என பயணிகள் கூறுகிறார்கள்.
அந்த நபர் உத்தரப்பிரதேசத்தை சேர்ந்தவராக இருக்கலாம் என போலீஸார் சந்தேகிக்கிறார்கள். மேலும் சந்தேகிக்கப்படும் நபருடைய டைரி என சொல்லப்படும் ஒரு பொருளை அவர் அமர்ந்திருந்த இருக்கை அருகே போலீஸார் கைப்பற்றினர். அதில் ஆங்கிலம், இந்தி மொழியில் எழுதப்பட்டிருந்தன. அதில் கன்னியாகுமரி, திருவனந்தபுரம், கொல்லம் ஆகிய ஊர்களின் பெயர் எழுதப்பட்டிருந்தது. ஒரு வேலை அந்த நபர் நாசவேலை செய்து ரயிலை விபத்துக்குள்ளாக்கி பெரும் உயிர் சேதத்தை ஏற்படுத்தும் நோக்கில் இவற்றையெல்லாம் செய்தாரா என்பது தெரியவில்லை. அந்த நபர் கைது செய்யப்பட்டால்தான் அவர் குறித்து தெரியவரும்.