நடிகை குஷ்பு மற்றும் அவரது மாமியாரை திடீரென சந்தித்துள்ளார் கிரிக்கெட் வீரர் மகேந்திர சிங் தோனி.
தமிழ் சினிமாவின் பிரபல நடிகைகளில் ஒருவர் குஷ்பு. இந்தி படங்களின் மூலம் திரைத்துறைக்கு அறிமுகமானாலும் நடிகை குஷ்புவை உச்சத்திற்கு கொண்டு சென்றது தென்னிந்திய சினிமாதான். அதிலும் குறிப்பாக தமிழ் சினிமா நடிகை குஷ்புவுக்கு சிவப்புக் கம்பள வரவேற்பு கொடுத்து தமிழ் நாட்டு மருமகளாவே ஆக்கிக் கொண்டது. தமிழ், தெலுங்கு, மலையாளம், கன்னடம், இந்தி உள்ளிட்ட பல மொழி படங்களில் நடித்து ரசிகர்களின் கனவு கன்னியாக வலம் வந்த நடிகை குஷ்பு, கடந்த 2000ஆம் ஆண்டு இயக்குநர் சுந்தர் சியை காதலித்து திருமணம் செய்து கொண்டார். சினிமா மட்டுமின்றி சீரியல்களில் கொடிக்கட்டி பறந்த குஷ்பு அரசியல்வாதியாகவும் வலம் வருகிறார். தற்போது பாஜகவில் உள்ள நடிகை குஷ்பு தேசிய மகளிர் ஆணைய உறுப்பினராகவும் உள்ளார்.
இந்நிலையில், நடிகை குஷ்பு சென்னை சூப்பர் கிங்ஸ் அணியின் கேப்டன் மகேந்திர சிங் தோனியை சந்தித்துள்ளார். மேலும், தனது மாமியார் அதாவது இயக்குநர் சுந்தர் சியின் தாயாரையும் தோனியை சந்திக்க வைத்துள்ளார் நடிகை குஷ்பு. தனது மாமியார் கிரிக்கெட் வீரர் மகேந்திர சிங் தோனிகு முத்தம் கொடுத்த புகைப்படத்தையும் தனது சமூக வலைதள பக்கத்தில் பகிர்ந்துள்ள நடிகை குஷ்பு “ஹீரோக்கள் உருவாக்கப்படவில்லை, அவர்கள் பிறக்கிறார்கள். அதை தோனி நிரூபித்துள்ளார். எங்கள் சிஎஸ்கே தல தோனியை பாராட்ட வார்த்தைகள் இல்லாமல் இருக்கிறேன். அவர் என் மாமியாரை சந்தித்தார். என் மாமியாருக்கு 88 வயது. நல்ல ஆரோக்கியத்தையும், மகிழ்ச்சியையும் அவர்களுடைய வாழ்க்கையில் சேர்த்திருக்கிறார் தோனி. இதற்காக அவருக்கு நன்றி” என்று பதிவிட்டுள்ளார்.
தோனி குஷ்பு குடும்பத்தினரை சந்தித்த போட்டோக்கள் இணையத்தில் பெரும் வைரலாகி வருகிறது. இதனை பார்த்த ரசிகர்கள் எங்க தல தோனிக்கு பெரிய விசில் போடுங்க என கமெண்ட் செய்து வருகின்றனர். திரைத்துறையில் தயாரிப்பாளராக அடியெடுத்து வைத்துள்ள மகேந்திர சிங் தோனி தமிழ் சினிமாவில் படங்களை தயாரித்து வருகிறார் என்பது குறிப்பிடத்தக்கது.