ஆளுநர் ஆர். என்.ரவி அரசியலமைப்பு நெருக்கடியை உருவாக்க முயற்சிப்பதாக முத்தரசன் குற்றம் சாட்டியுள்ளார்.
அமைச்சர் செந்தில் பாலாஜியை அமலாக்கத்துறை கைது செய்திருக்கும் நிலையில் அவரது இலாகாவை இரு அமைச்சர்களுக்கு பிரித்து வழங்க முதல்வர் ஸ்டாலின் திட்டமிட்டார். அதன்படி, செந்தில் பாலாஜி பார்த்து வந்த மின்சாரத்துறையை அமைச்சர் தங்கம் தென்னரசுவுக்கும், மதுவிலக்கு ஆயத்தீர்வை துறையை அமைச்சர் முத்துசாமியிடம் வழங்கவும் முடிவு எடுத்து அதற்கு ஒப்புதல் அளிக்கக்கோரி ஆளுநர் ரவிக்கு கடிதம் எழுதி அனுப்பப்பட்டது. ஆனால், அந்த கடிதத்தை திருப்பி அனுப்பிய ஆளுநர் அந்த கடிதத்தில், செந்தில் பாலாஜி அமலாக்கத்துறையால் கைது செய்யப்பட்டிருப்பதை குறிப்பிடப்படவில்லை என்பதை சுட்டிக்காட்டியுள்ளார். இதனை தொடர்ந்து இரண்டாவது முறையாக ஆளுநருக்கு முதல்வர் கடிதம் அனுப்பியுள்ளார்.
இந்த நிலையில், ஆளுநர் ஆர்.என்.ரவி, அரசியலமைப்பு நெருக்கடியை உருவாக்க முயற்சிப்பதாக இந்தியக் கம்யூனிஸ்ட் மாநிலச் செயலாளர் முத்தரசன் விமர்சித்துள்ளார். இதுகுறித்து அவர் கூறியுள்ளதாவது:-
பாஜக மத்திய அரசின் அமலாக்கத்துறை தமிழக அரசை குறிவைத்து தொடர் தாக்குதல் நடத்தி வருகிறது. கடந்த சில வாரங்களாக அமைச்சர் வி.செந்தில்பாலாஜி உறவினர்கள், நண்பர்கள், உதவியாளர்கள் எனத் தொடங்கி நடத்தி வரும் சோதனை தாக்குதல் அவரது அதிகாரபூர்வமான அரசு இல்லத்திலும், தலைமைச் செயலகத்தில் உள்ள அவரது அலுவலகத்துக்கும் சென்றுள்ளது.
“எந்த விசாரணைக்கும் ஒத்துழைக்க தயார்” என அவர் அறிவித்த நிலையிலும் சட்ட முறைகளை நிராகரித்து, மனித உரிமைகளை அலட்சியப்படுத்திய அமலாக்கத்துறையின் நடவடிக்கையால் அவரது உடல்நிலை கடுமையாக பாதிக்கப்பட்டு சிகிச்சை பெற வேண்டிய நிர்பந்தத்துக்கு தள்ளப்பட்டுள்ளது. அமைச்சர், உயிருக்கு போராடி வரும் நிலையில் அவரது சட்டபூர்வ கடமைகளை கவனிக்கும் பொறுப்பை அமைச்சரவை உறுப்பினர்களிடம் முதல்வர் பிரித்து வழங்கியுள்ளார். மக்கள் பிரதிநிதித்துவ ஆட்சி முறையில் முதல்வர் நடவடிக்கைகளுக்கு ஒப்புதல் தர வேண்டியது ஆளுநரின் சட்டப்படியான கடமைப் பொறுப்பாகும். ஆனால் தமிழக ஆளுநர் ஆர்.என்.ரவி, தமிழக அரசுக்கு எதிராக அரசியலமைப்பு நெருக்கடியை ஏற்படுத்தும் வன்மத்துடன் தொடர்ந்து செயல்பட்டு வருகிறார். தற்போது தமிழக மக்களை தவறாக வழிநடத்தும் உள்நோக்கம் கொண்ட குறிப்புகளுடன் முதல்வர் கடிதத்தை திருப்பி அனுப்பி உள்ளார்.
ஆளுநரின் அப்பட்டமான அதிகார அத்துமீறலையும், மலிவான அரசியல் நடவடிக்கையையும் இந்தியக் கம்யூனிஸ்ட் கட்சியின் தமிழ்நாடு மாநில செயற்குழு வன்மையாகக் கண்டிக்கிறது. ஆர்.என்.ரவி ஆர்எஸ்எஸ் + பாஜக ஆதரவு அரசியலை ஆளுநர் மாளிகையில் இருந்து நடத்துவதை தமிழகம் வினாடிப் பொழுதும் அனுமதிக்காது என்பதை உணர வேண்டும் என எச்சரிக்கை செய்கிறது. இவ்வாறு அவர் கூறியுள்ளார்.