அதிமுக – பாஜக கூட்டணி பாறை போல உறுதியாக இருப்பதாக தமிழக பாஜக துணைத் தலைவர் நாராயணன் திருப்பதி தெரிவித்துள்ளார்.
மறைந்த தமிழக முதல்வரும், திராவிட அரசியலின் முன்னோடியுமான அண்ணாதுரை குறித்து அண்ணாமலை தரக்குறைவாக பேசியது அதிமுக – பாஜக கூட்டணியை பதம் பார்த்துள்ளது. இதுவரை அண்ணாமலை பல விஷயங்களில் அதிமுகவை சீண்டிய போதிலும், டெல்லியின் தலையீட்டால் பொறுமையாக இருந்த அதிமுக இன்று பொங்கி எழுந்துவிட்டது.
அதிமுக கூட்டணியில் இருந்து பாஜகவை வெளியேற்றப்பட்டதாக கட்சியின் மூத்த தலைவர் ஜெயக்குமார் நேற்று அதிகாரப்பூர்வமாகவே அறிவித்து விட்டார். மேலும், அண்ணாமலையையும், பாஜகவையும் அவர் சரமாரியாக விமர்சித்தார். “வேஸ்ட் லக்கேஜ் பாஜகவை தூக்கியெறிந்து விட்டோம். காலே இல்லாத பாஜகவால் இனி தமிழ்நாட்டில் காலூன்றவே முடியாது. இனி நோட்டா உடன் தான் பாஜகவுக்கு போட்டி” என கலாய்த்தார்.
கூட்டணி பிரிந்ததை அடுத்து அதிமுக தலைவர்களும், பாஜக தலைவர்களும் ஒருவரையொருவர் சரமாரியாக விமர்சித்து வருகிறார்கள். குறிப்பாக, தமிழக பாஜக துணைத் தலைவர் நாராயணன் திருப்பதி, “அண்ணாதுரை பற்றி இல்லாததையா அண்ணாமலை சொல்லிவிட்டார்.. அண்ணாதுரையை ஈவேரா விமர்சனம் செய்யாததா? வரலாற்று பதிவுகளை சொல்வதில் என்ன தவறு இருக்கிறது?” எனக் கேள்வியெழுப்பினார்.
இப்படி காரசாரமாக பேசிய நாராயணன் திருப்பதி, தற்போது வெளியிட்டுள்ள டுவீட் மிகுந்த அதிர்ச்சியை ஏற்படுத்தியுள்ளது. அதில், “அதிமுக – பாஜக கூட்டணி என்பது உறுதியான பாறையை போல உள்ளது. சில தொலைக்காட்சி சேனல்களில் நான் பேசியது வேறு மாதிரியான அர்த்தத்தை தந்திருக்கும். அதற்காக வருத்தம் தெரிவிக்கிறேன். அதிமுக – பாஜக கூட்டணி தொடர்பாக முடிவு எடுக்க வேண்டியது பாஜக தலைமையும், அதிமுக தலைமையும் தான். வரும் நாடாளுமன்றத் தேர்தலில் தமிழ்நாட்டில் உள்ள அனைத்து தொகுதிகளிலும் என்டிஏ கூட்டணி வெற்றி பெறும்” எனத் தெரிவித்துள்ளார்.