உடல் நலக் குறைவால் மருத்துவமனையில் சிகிச்சை பெற்று வந்த தேமுதிக தலைவர் விஜயகாந்த் சமீபத்தில் வீடு திரும்பிய நிலையில் நேற்று இரவு மீண்டும் அனுமதிக்கப்பட்டுள்ளார்.
நடிகரும், தேமுதிக தலைவருமான விஜயகாந்த் திரையுலகில் எண்ணற்ற ரசிகர்களையும் அரசியலில் கட்சிக்கு அப்பாற்பட்ட ஆதரவாளர்களையும் கொண்டுள்ளார். கடந்த சில ஆண்டுகளாகவே அவரது உடல்நிலை மிக மோசமாக நலிவடையத் தொடங்கியது. தீவிர சிகிச்சை அளிக்கப்பட்டு வருகிறது. அவரது உடல்நிலை சரியில்லாமல் போனதிலிருந்தே கட்சியும் தொய்வைச் சந்திக்க தொடங்கியது.
கடந்த மாத இறுதியில் அவரது உடல்நிலை மீண்டும் நலிவடைந்ததால் சென்னை மியாட் மருத்துவமனையில் அனுமதிக்கப்பட்டார். அங்கு அவருக்கு தொடர் சிகிச்சைகள் அளிக்கப்பட்டு வந்தன. தீவிர சிகிச்சை பிரிவில் (ஐசியு) அனுமதிக்கப்பட்ட அவருக்கு சில நேரங்களில் சுயமாக சுவாசிப்பதில் சிரமம் இருந்ததால் அவ்வப்போது செயற்கை சுவாசம் அளிக்கப்பட்டது. நுரையீரல் நிபுணர்கள் கண்காணித்து அவருக்கு சிகிச்சை அளித்தனர். மூன்று வார காலத்துக்கும் மேலாக சிகிச்சை பெற்ற விஜயகாந்த் டிசம்பர் 12ஆம் தேதி வீடு திரும்பினார்.
விஜயகாந்த் நலமுடன் இருக்கிறார், அவர் உடல்நிலை தொடர்பாக வரும் வதந்திகளை நம்ப வேண்டாம் என்று ஊடகங்கள் வாயிலாக கூறினார் அவரது மனைவி பிரேம லதா. தொண்டர்கள் முன்னிலையில் விஜயகாந்தை அழைத்து வர வேண்டும் என நினைத்த பிரேமலதா தேமுதிக பொதுக்குழு கூட்டத்துக்கு விஜயகாந்தை அழைத்து வந்தார். உடல் மெலிந்துபோன விஜயகாந்தை பார்த்து ரசிகர்கள், தொண்டர்கள் கண்ணீர் வடித்தனர். அந்த பொதுக்குழு கூட்டத்தில் விஜயகாந்த் வகித்து வந்த பொதுச்செயலாளர் பதவி பிரேமலதாவுக்கு வழங்கப்பட்டது குறிப்பிடத்தக்கது.
மருத்துவமனையில் இருந்து வீடு திரும்பி 15 நாள்கள் முடிந்த நிலையில் விஜயகாந்த் மீண்டும் மியாட் மருத்துவமனையில் அனுமதிக்கப்பட்டுள்ளார். இது தொடர்பாக தேமுதிக சார்பில் வெளியிடப்பட்டுள்ள செய்திக் குறிப்பில், “தேசிய முற்போக்கு திராவிட கழக தலைவர் விஜயகாந்த் அவர்கள் 15 நாட்களுக்குப் பிறகு வழக்கமான பரிசோதனைக்காக மருத்துவமனைக்கு அழைத்து வரப்பட்டார். பூரண நலத்துடன் இருக்கிறார். பரிசோதனை முடிந்து நாளை மறுநாள் (நாளை) வீடு திரும்புகிறார்” என தெரிவிக்கப்பட்டுள்ளது.