கமலுக்கு சட்டமன்ற தேர்தலில் தோற்று மூக்குடைந்தது பத்தாது, நாடாளுமன்ற தேர்தலில் வேறு என்னெல்லாம் உடைய போகிறதோ என வானதி சீனிவாசன் விமர்சித்துள்ளார்.
தமிழகத்தில் நாடாளுமன்ற மக்களவை தேர்தல் விரைவில் நடைபெற உள்ள நிலையில் திமுகவின் தொகுதி பங்கீடு குறித்த பேச்சு வார்த்தையும் சூடுபிடித்துள்ளது. காங்கிரஸ், சிபிஐ, சிபிஎம், மதிமுக உள்ளிட்ட கட்சிகளுடன் முதல் கட்ட பேச்சுவார்த்தை முடிந்துள்ளது. கட்சிகள் தங்களுக்கு எத்தனை தொகுதிகள் வேண்டும் எந்தெந்த தொகுதிகள் வேண்டும் என்பது குறித்த விருப்ப பட்டியலை திமுக தேர்தல் குழுவிடம் அளித்துள்ளன. தொகுதி பங்கீடு தொடர்பாக காங்கிரஸ் கட்சி இரண்டாம் கட்ட பேச்சு வார்த்தை நடத்த உள்ளது. இந்நிலையில் மக்கள் நீதி மய்யம் கட்சியும் திமுக கூட்டணியில் இணைய உள்ளதாகவும் மக்கள் நீதி மய்யம் கட்சி இரண்டு தொகுதிகளை கேட்க திட்டமிட்டுள்ளதாகவும் கூறப்படுகிறது. இதுதொடர்பாக முதல்வரும் திமுக தலைவருமான ஸ்டாலினை அக்கட்சியின் தலைவர் கமல்ஹாசன் விரைவில் சந்தித்து பேச உள்ளதாகவும் கூறப்படுகிறது.
திமுகவுடன் கூட்டணி வைத்து போட்டியிட்டாலும் தங்களின் டார்ச் லைட் சின்னத்தில்தான் போட்டியிட வேண்டும் என்பதில் கமல்ஹாசன் உறுதியாக உள்ளதாகவும் கூறப்படுகிறது. டார்ச் லைட் சின்னம் ஒதுக்கக்கோரி மக்கள் நீதி மய்யம் கட்சி ஏற்கனவே தேர்தல் ஆணையத்திடம் கோரிக்கை விடுத்துள்ளது. டார்ச் லைட் சின்னம் கிடைக்காவிட்டாலும் மக்கள் நீதி மய்யம் தனி சின்னத்தில்தான் போட்டியிட வேண்டும் என்ற முடிவில் உள்ளதாக கூறப்பபடுகிறது. மேலும் நடிகர் கமல்ஹாசன் தென் சென்னை மற்றும் கோவையில் போட்டியிட விரும்புவதாகவும் தகவல் வெளியாகியுள்ளது.
இந்நிலையில் பாஜக தேசிய மகளிர் அணி தலைவர் வானதி சீனிவாசன், நாடாளுமன்ற தேர்தலில் போட்டியிடும் கமல்ஹாசனின் முடிவு குறித்து கருத்து தெரிவித்துள்ளார். கோவையில் பேட்டியளித்துள்ள வானதி சீனிவாசன், ஏற்கனவே சட்டமன்ற தேர்தலில் கோவை தெற்கு தொகுதியில் எதிர்த்து களம் கண்டதாக தெரிவித்துள்ளார். ஏற்கனவே கமல்ஹாசனுக்கு மூக்கு உடைந்தது போல தற்போது என்னென்ன உடைய காத்திருக்கிறாரோ என்றும் வானதி சீனிவாசன் நக்கலடித்தார். மேலும் நாடாளுமன்ற தேர்தலை பொறுத்தவரை வேட்பாளர்களை தேசிய தலைமைதான் முடிவு செய்யும் என்றும் வானதி சீனிவாசன் தெரிவித்துள்ளார்.
கடந்த சட்டமன்ற தேர்தலில் கோவை தெற்கு தொகுதியில் நடிகர் கமல்ஹாசனை எதிர்த்து பாஜக வேட்பாளாரான வானதி சீனிவாசன் போட்டியிட்டார். இதில் கடைசி வரை கமல்ஹாசனுக்கு டஃப் கொடுத்த வானதி சீனிவாசன் இறுதியில் வெற்றி பெற்றார். இந்நிலையில் நடைபெற உள்ள நாடாளுமன்ற தேர்தலில் மீண்டும் கோவையில் போட்டியிட நடிகர் கமல்ஹாசன் விரும்புவதாக கூறப்படும் நிலையில், அவருக்கு மீண்டும் தோல்விதான் கிடைக்கும் என்பதை போல கருத்து தெரிவித்துள்ளார் வானதி சீனிவாசன்.