ஆளுநர் இருக்கும் போது, சாவர்க்கர், கோட்சே ஆகியோரின் பெயர்களை சபாநாயகர் அப்பாவு ஏன் குறிப்பிட வேண்டும்? இப்படி தனது வரம்பை மீறி சபாநாயகர் செயல்பட்டிருக்கிறார் என்று பாஜக எம்எல்ஏ வானதி சீனிவாசன் கூறினார்.
நடப்பாண்டின் முதல் தமிழக சட்டசபைக் கூட்டம் நேற்று நடைபெற்றது. முதல் கூட்டத்தொடர் என்பதால் ஆளுநர் உரையுடன் கூட்டம் தொடங்கியது. ஆனால், ஆளுநர் ரவி தனது உரையை முழுமையாக வாசிக்காமல் வெறும் 2 நிமிடம் மட்டுமே வாசித்துவிட்டு அமர்ந்தார். மேலும், கூட்டத்தொடர் தொடங்கும் போது தேசிய கீதம் இசைக்கப்படவில்லை என்பதையும் அவர் குற்றச்சாட்டாக தெரிவித்தார். இதையடுத்து, சபாநாயகர் அப்பாவு சட்டென எழுந்து ஆளுநர் உரையை முழுமையாக வாசித்தார். வாசித்து முடித்த பின்னர், “ஆளுநர் உரை நிகழ்த்துவதற்காக ஆளுநர் ரவியை தமிழக அரசு முறையாக, மரியாதையாக அழைத்து வந்தது. வந்த இடத்தில் உரையை குறைவாக வாசித்தார். அதை கூட நான் குறையாக கூறவில்லை. ஆனால் தேசிய கீதம் இசைக்கப்படவில்லை எனக் கூறினார். எல்லோருக்கும் நிறைய கருத்துகள் இருக்கிறது. அதை எல்லா இடத்திலும் கூறுவது முறையல்ல. தமிழகத்தில் எவ்வளவு பெரிய புயல், வெள்ளம் ஏற்பட்டது. அதற்கு ஒரு பைசா கூட மத்திய அரசு தரவில்லை. அதை தருமாறு ஆளுநர் கேட்கலாமே.. சாவர்க்கர், கோட்சே வழியில் வந்தவர்களுக்கு நாங்கள் சற்றும் குறைந்தவர்கள் அல்ல” என அப்பாவு கூறினார்.
அப்பாவு இவ்வாறு கூறியதும், ஆளுநர் ரவி உடனடியாக எழுந்து அவையை விட்டு வெளியேறினார். ஆளுநர் ரவியின் இந்த செயல்பாடுகள் தான் தற்போது தமிழக அரசியல் களத்தில் பேசுபொருளாகி வருகிறது. ஆளுநர் இப்படி நடந்து கொண்டதற்கு திமுகவும், அதன் கூட்டணிக் கட்சிகளும் கடுமையாக விமர்சித்து வருகின்றன. அதே சமயத்தில், பாஜகவோ ஆளுநருக்கு ஆதரவாக கருத்து தெரிவித்து வருகிறது.
இந்நிலையில், இந்த விவகாரம் குறித்து கோவை தெற்கு தொகுதி பாஜக எம்எல்ஏ வானதி சீனிவாசனிடம் நிருபர்கள் கேள்வியெழுப்பினர். அதற்கு பதிலளித்த அவர் கூறியதாவது:-
ஆளுநர் உரையில் பொய் பொய்யா தமிழக அரசு எழுதி இருக்கு. மழை, வெள்ளத்தை இந்த அரசாங்கம் வெற்றிகரமாக சமாளித்ததாக பொய் சொல்றாங்க. அதே போல, ஜிஎஸ்டி வரி இழப்பீட்டையோ அல்லது மெட்ரோ பணிகளுக்கான நிதியையோ கேட்பதற்கு பல தளங்கள் இருக்கின்றன. அதை விட்டுவிட்டு, ஆளுநர் உரையில் அதை சொல்ல வேண்டிய அவசியம் என்ன?
எல்லாத்துக்கும் மேலாக, ஆளுநர் இருக்கும் போது சாவர்க்கர், கோட்சேவை சபாநாயகர் குறிப்பிடுறாரு. ஏன் அவர்கள் பெயரை இங்கு சொல்லணும்? தன்னோட வரையறையை மீறி சபாநாயகர் நடந்து கொண்டிருக்கிறார். அதேபோல, தேசிய கீதத்தை சட்டமன்றக் கூட்டத்தொடருக்கு முன்பாக இசைப்பதில் என்ன பிரச்சினை? அது நம்ம நாட்டோ கீதம் தானே.. அதை இசைப்பதில் தமிழக அரசுக்கு என்ன கஷ்டம்? தேசிய கீதத்தை ஏன் அவமதிக்கிறீங்க?. இவ்வாறு வானதி சீனிவாசன் கூறினார்.