நக்சல்கள் பதுங்கியிருப்பதாக பாதுகாப்பு படையினருக்கு தகவல் கிடைத்த நிலையில், விரைந்து சென்ற நிலையில் மோதல் வெடித்தது. இதில் நக்சலைட்டுகள் 30 பேர் என்கவுன்ட்டர் செய்யப்பட்டிருப்பதாக தகவல்கள் வெளியாகியுள்ளன.
சத்தீஸ்கர் மாநிலம் நாராயண்பூர் – தண்டேவாடா எல்லை பகுதியில் உள்ள மாத் என்ற இடத்தில் நக்சல்கள் பதுங்கியிருப்பதாக தகவல் கிடைத்தது. இதையடுத்து பாதுகாப்பு படையினர் விரைந்து சென்றனர். அப்போது இருதரப்பினருக்கும் இடையில் மோதல் ஏற்பட்டது. இதில் 30 நக்சலைட்டுகள் என்கவுன்ட்டர் செய்யப்பட்டுள்ளதாக லேட்டஸ்ட் தகவல்கள் கிடைத்துள்ளன. அவர்களிடம் இருந்து ஏராளமான ஆயுதங்கள் கைப்பற்றப்பட்டுள்ளன.
மேலும் நக்சல்கள் பதுங்கியுள்ளனரா என்று தேடுதல் வேட்டை நடைபெற்று வருகிறது. சத்தீஸ்கர் மாநிலத்தில் நடந்த சம்பவம் தேசிய அளவில் பெரும் அதிர்ச்சியை ஏற்படுத்தியுள்ளது. இதுதொடர்பாக பிடிஐ செய்தி நிறுவனத்திடன் பேசிய மூத்த போலீஸ் அதிகாரி ஒருவர், பிற்பகல் 1 மணியளவில் நக்சல்களுக்கும், பாதுகாப்பு படையினருக்கும் இடையில் சண்டை தொடங்கியது. நாராயண்பூர் மற்றும் தண்டேவாடா இடையில் உள்ள அபுஜ்மத் வனப்பகுதியில் நக்சல்கள் பதுங்கியிருப்பதாக தான் தகவல் கிடைத்தது. அதன் பிறகு பல மணி நேரமாக சண்டை நடந்து வருகிறது. கூட்டு பாதுகாப்பு படையை சேர்ந்த வீரர்கள் அதிரடி தாக்குதலில் ஈடுபட்டு வருகின்றனர். சமீபத்திய தகவலில் தான் உயிரிழந்தவர்களின் எண்ணிக்கை குறித்து 30 எனத் தெரியவந்தது.
பதுங்கியிருப்பவர்கள் மேலும் இருக்க வாய்ப்பிருக்கிறது. எனவே பலி எண்ணிக்கை அதிகரிக்கக் கூடும். கொல்லப்பட்ட நக்சல்களின் உடல்களை மீட்டு அடையாளம் காணும் பணிகள் நடந்து வருகின்றன. தற்போது இருதரப்பிலும் சண்டை முடிந்துள்ளது. அதேசமயம் தேடுதல் வேட்டை இன்னும் முடிவுக்கு வரவில்லை என்று தெரிவித்தார். என்கவுன்ட்டரில் கொல்லப்பட்ட நக்சல்களிடம் இருந்து ஏகே-47 துப்பாக்கிகள், எஸ்.எல்.ஆர் துப்பாக்கிகள் உள்ளிட்டவை பறிமுதல் செய்யப்பட்டுள்ளன.
மேலும் பெரிய அளவில் வெடிபொருட்களும் சிக்கியுள்ளன. இவற்றை பாதுகாப்பான முறையில் அப்புறப்படுத்தும் வேலைகள் நடந்து வருகின்றன. சத்தீஸ்கரில் இவ்வளவு பெரிய என்கவுன்ட்டர் நடந்திருப்பது தேசிய அளவில் பரபரப்பாக பேசப்பட்டு வருகிறது. நடப்பாண்டில் பாஸ்டர் ஏரியாவில் மட்டும் இதுவரை 164 நக்சல்கள் கொல்லப்பட்டிருப்பதாக புள்ளிவிவரங்கள் தெரிவிக்கின்றன. நக்சல்களை ஒடுக்க கடும் நடவடிக்கையில் சத்தீஸ்கர் அரசு ஈடுபட்டு வருவதாக கூறியுள்ளது.