நடிகர் அசோக் செல்வன் ‘கண்ட நாள் முதல்’ படத்தை இயக்கிய பிரியா வி இயக்கத்தில் தன்னுடைய அடுத்தப்படத்தில் இணைந்துள்ளார். இதுகுறித்த அறிவிப்பு வெளியாகியுள்ள நிலையில் விரைவில் படத்திற்கான அறிவிப்பு வெளியாகும் என்று எதிர்பார்க்கப்படுகிறது.
நடிகர் அசோக் செல்வன் அடுத்தடுத்த தேர்ந்தெடுத்த கதைக்களங்களில் தன்னை இணைத்து வெற்றிநாயகனாக வலம் வந்துக் கொண்டிருக்கிறார். கடந்த ஆண்டில் சரத்குமாருடன் இணைந்து போர் தொழில் படத்தில் நடித்திருந்தார். சைக்கோ திரில்லர் படமாக வெளியான இந்தப் படம் ரசிகர்களை வெகுவாக கவர்ந்து வெற்றிப்பட வரிசையில் இணைந்தது. இந்நிலையில் இந்த ஆண்டின் துவக்கத்திலேயே இவரது ப்ளூ ஸ்டார் படம் வெளியாகி சிறப்பான வெற்றியை பெற்றுத் தந்துள்ளது. கிரிக்கெட்டை மையமாக கொண்டு வெளியான இந்தப் படம் அசோக் செல்வனின் இயல்பான நடிப்பால் வண்ணம் பெற்றுள்ளது.
இந்நிலையில் அடுத்ததாக கண்ட நாள் முதல் படத்தை இயக்கிய பிரியா வி இயக்கத்தில் அடுத்தப்படத்தில் அசோக் செல்வன் கமிட்டாகியுள்ளார். படத்திற்கு ‘பொன் ஒன்று கண்டேன்’ என்று பெயரிடப்பட்டுள்ளது. முக்கோண காதல் கதையாக உருவாகவுள்ள இந்தப் படத்தில் அசோக் செல்வனுடன் ஐஸ்வர்யா லெட்சுமி, வசந்த் ரவி உள்ளிட்டோர் லீட் கேரக்டர்களில் நடிக்க கமிட்டாகியுள்ளனர், படத்திற்கு யுவன் சங்கர் ராஜா இசையமைக்கவுள்ளார். விரைவில் இந்தப் படத்தின் அறிவிப்பு வெளியாகவுள்ளதாக கூறப்பட்டுள்ளது. படத்தின் ப்ரீ புரொடக்ஷன் வேலைகளை தற்போது பிரியா முடுக்கிவிட்டுள்ளார்.