கமல்ஹாசனின் ராஜ் கமல் பிலிம்ஸ் இன்டர்நெஷனல் நிறுவனம் நேற்று திடீரென இயக்குனர் லோகேஷ் கனகராஜ் மற்றும் ஸ்ருதிஹாசன் இருக்கும் ஒரு போஸ்டரை வெளியிட்டது.
மாநகரம் படத்தின் மூலமாக தமிழ் சினிமாவில் இயக்குனராக அறிமுகமானவர் இயக்குனர் லோகேஷ் கனகராஜ். மாநகரம் படத்தை தொடர்ந்து கைதி, மாஸ்டர், விக்ரம், லியோ என வெற்றி படங்களை கொடுத்து வருகிறார். தற்போது சூப்பர்ஸ்டார் ரஜினிகாந்தின் தலைவர் 171 படத்தை இயக்க தீவிரம் காட்டி வரும் லோகேஷ் கனகராஜ் சமீபத்தில் சிங்கப்பூர் சலூன் படத்தில் வந்திருப்பார். தயாரிப்பாளராக அவதாரம் எடுத்த நம்ம லோகி இப்போ ரசிகர்களுக்கு மிகப்பெரிய சர்ப்ரைஸ் கொடுத்திருக்கிறார்.
உலகநாயகன் கமல்ஹாசனின் மூத்த மகள் ஸ்ருதி ஹாசன். இவர் நடிகர் மட்டுமா? இல்லை.. இல்லை.. பின்னணி பாடகர், இசையமைப்பாளர், பாடலாசிரியர் என பல பரிணாமங்களை கொண்டிருக்கிறார். தமிழ் மட்டுமல்லாது தெலுங்கு மற்றும் ஹிந்தி மொழிகளிலும் படங்களில் நடித்து வருகிறார் ஸ்ருதி ஹாசன். இவர் படங்களில் நடிப்பதோடு சுயாதின கலைஞராக இசை ஆல்பங்களை தயாரித்து ரிலீஸ் செய்திருக்கிறார்.
இந்நிலையில் நேற்று ஸ்ருதி ஹாசன் மற்றும் லோகேஷ் கனகராஜ் இருக்கக்கூடிய ஒரு போஸ்டரை வெளியிட்டது ராஜ் கமல் பிலிம்ஸ் நிறுவனம்.
எந்த ஒரு முன்னறிவிப்பும் இல்லாமல் ராஜ் கமல் நிறுவனம் வெளியிட்ட இந்த போஸ்டர் ரசிகர்கள் மத்தியில் மிகப்பெரிய குழப்பத்தை ஏற்படுத்தியது. போஸ்டர் எதற்கென்றே தெரியாமல் குழம்பிக் கொண்டிருந்த வேளையில் பெரும்பாலான மக்களுக்கு புரியாத குழப்பம் தரும் வார்த்தைகளையும் இந்த போஸ்டர் உள்ளடக்கியிருந்தது. ‘இனிமேல் டெலுலு இஸ் தி நியூ சொலுலு’ என்கிற கேப்ஷனோட இதுவே ரிலேஷன்ஷிப், இதுவே சிச்சுவேஷன்ஷிப், இதுவே டெலியூஷன்ஷிப் என ஹேஷ்டேகும் இந்த போஸ்டர் பதிவாகி இருந்தது.
இந்த போஸ்டர் வெளியாகி ஒரு சில நிமிடங்களிலேயே எக்கச்சக்கமான பார்வையாளர்களை சென்றடைந்தது. லோகேஷ் கனகராஜ் இயக்கி பார்த்திருக்கிறோம்.. ஸ்ருதி ஹாசன் நடித்தும், பாடல் பாடியும், டான்ஸ் ஆடியும் பார்த்திருக்கிறோம். இருவரும் இணைந்து என்ன செய்யப் போகிறார்கள் என்பதே ரசிகர்கள் கேட்ட கேள்வியாக இருந்தது. தற்போதுவரை இந்த போஸ்டர் அதிகப்படியான ரசிகர்களால் பகிரப்பட்டு என்னவாக இருக்கும் என தொடர்ந்து கேள்விகளை கேட்டு வருகிறார்கள்.
தற்போது இந்த இனிமேல் டெலுலு இஸ் தி நியூ சொலுலு குறித்த தகவல் வெளியாகியுள்ளது. ஸ்ருதி ஹாசன் சுயாதீன கலைஞராக இசை ஆல்பங்களை வெளியிட்டு இருக்கிறார். முன்னதாக, எட்ஜ், ஷீ ஐஸ் எ ஹீரோ ஆகிய இரண்டு இசை ஆல்பங்களை இவர் வெளியிட்டு இருக்கிறார். தற்போது ஸ்ருதி ஹாசன் உருவாக்கும் அவரது புதிய இசை ஆல்பத்திற்கான போஸ்டர்தான் இந்த வைரல் போஸ்டராம்.
இனிமேல் டெலுலு இஸ் தி நியூ சொலுலு இசை ஆல்பத்திற்கான வரிகளை ஸ்ருதிஹாசன் எழுதி இதற்கான இசையையும் அவரே அமைக்க மியூசிக் வீடியோவாக எடுக்கிறாராம். இந்த மியூசிக் ஆல்பத்தில் லோகேஷ் கனகராஜ் நடித்தால் சிறப்பாக இருக்கும் என்று நினைத்தவர், அவரை அணுக, பாடலைக் கேட்டதும் ஓகே சொல்லி இருக்கிறார் லோகி. இந்த இசை ஆல்பத்திற்கான படப்பிடிப்பு நேற்று தொடங்கியுள்ளது. மொத்தம் இரண்டு நாட்கள்தான் இந்த இசை ஆல்பத்திற்கான படப்பிடிப்பாம்.
மகள் இசையமைத்து இயக்கும் இந்த இசை ஆல்பத்தை உலகநாயகன் கமல்ஹாசன் அவருடைய தயாரிப்பு நிறுவனமான ராஜ் கமல் பிலிம்ஸ் இன்டர்நெஷனல் நிறுவனத்தின் மூலம் தயாரிக்கிறார். தற்போதைய ட்ரெண்டிங் ரிலேஷன்ஷிப்பை மையப்படுத்திய இந்த இசை ஆல்பம் காதலர் தினத்தன்று ரிலீஸ் ஆகும் எனவும் கூறப்படுகிறது. இந்த இசை ஆல்பத்தின் படப்பிடிப்பு முடிந்ததும் இது குறித்த மற்ற போஸ்டரும் வரலாம் என எதிர்பார்க்கப்படுகிறது.