தமிழ் சினிமாவில் பிரபலமான இளம் நடிகராக திகழ்பவர் கவின். வளர்ந்து வரும் நடிகரான இவருக்கு என்றே தனியொரு ரசிகர்கள் பட்டாளம் உள்ளது. ‘டாடா’ படத்தின் வெற்றிக்கு பின்னர் பிசியாக நடித்து வருகிறார். இந்நிலையில் கவினின் புதிய படம் குறித்து அதகளமான தகவல் ஒன்று வெளியாகியுள்ளது. இதனால் ரசிகர்கள் மத்தியில் உச்சக்கட்ட எதிர்பார்ப்பு எகிறியுள்ளது.
‘சரவணன் மீனாட்சி’ தொடர் மூலமாக சின்னத்திரையில் பிரபலம் ஆனவர் கவின். விஜய் டிவியில் பெரும் வரவேற்பை பெற்ற இந்த சீரியல் வாயிலாக ரசிகர்கள் மத்தியில் பரிட்சயம் ஆனார். இதனையடுத்து படங்களில் நடித்து வந்தவர், பிக்பாஸ் சீசன் 3 நிகழ்ச்சியில் கலந்துக்கொள்ளும் வாய்ப்பை பெற்றார். இதில் டைட்டில் வெல்லுவார் கவின் என எதிர்பார்க்கப்பட்டது. ஆனால் திடீரென பணப்பெட்டியை எடுத்துக்கொண்டு பிக்பாஸ் நிகழ்ச்சியை விட்டு வெளியேறி விட்டார். பிக்பாஸில் பாதியில் இருந்து விலகி இருந்தாலும், ரசிகர்கள் மத்தியில் பெரும் வரவேற்பை பெற்றார். இதனால் சினிமாவிலும் கவினுக்கு அமோகமான வரவேற்பு கிடைக்க ஆரம்பித்தது. அந்த வகையில் கடந்தாண்டு இவரது நடிப்பில் ‘டாடா’ படம் வெளியானது. அப்பா, மகன் பாசத்தை வைத்து ரிலீசான இந்தப்படம் வசூலில் சக்கை போடு போட்டது. இதனையடுத்து அடுத்தடுத்து சில படங்களில் கமிட்டாகி நடித்து வருகிறார் கவின்.
இந்நிலையில் வெற்றிமாறனுடன் அவர் இணைந்துள்ளதாக தகவல்கள் வெளியாகி ரசிகர்களின் எதிர்பார்ப்பினை எகிற வைத்து வருகிறது. தமிழ் சினிமாவில் சென்சேஷனல் இயக்குனராக திகழும் வெற்றிமாறன் தற்போது ‘விடுதலை 2’ படத்தினை இயக்கி வருகிறார். டைரக்ஷனில் பிசியாக இருந்து வரும் நிலையில் சில படங்களுக்கு கதை எழுதவும், தயாரிப்பிலும் ஈடுபட்டு வருகிறார். இந்நிலையில் வெற்றிமாறன் தயாரிக்கும் படம் ஒன்றில் கவின் நடிக்கவுள்ளதாக தகவல்கள் வெளியாகியுள்ளன. இப்படத்தினை வெற்றிமாறனின் உதவியாளரான விகர்னன் அசோக் என்பவர் இயக்கவுள்ளார். அத்துடன் இப்படத்தில் நயன்தாரா லீடிங் ரோலில் நடிக்கவிருப்பதாகவும் கூறப்படுகிறது. வெற்றிமாறனின் தயாரிப்பில் கவின், நயன்தாரா இருவரும் இணைந்து நடிக்கவிருப்பதாக வெளியாகியுள்ள தகவல் தற்போது ரசிகர்கள் மத்தியில் பெரும் எதிர்பார்ப்பினை கிளப்பியுள்ளது.