மாமன்னன் படத்தை தொடர்ந்து நடிகர் துருவ் விக்ரமை ஹீரோவாக வைத்து அவரது படத்தை அறிவித்திருந்தார் மாரி செல்வராஜ். இந்த படத்தின் நிலவரம் குறித்து ரசிகர்கள் கேள்வி எழுப்பி வருகிறார்கள். இந்நிலையில் இந்த படத்தின் படப்பிடிப்பு மார்ச்சில் துவங்கும் என்று தகவல் வெளியாகியுள்ளது.
பரியேறும் பெருமாள் படத்தின் மூலமாக இயக்குனராக அறிமுகமானவர் இயக்குனர் மாரி செல்வராஜ். பரியேறும் பெருமாள் படத்தை தொடர்ந்து தனுஷ் நடிப்பில் கர்ணன், உதயநிதி ஸ்டாலின் மற்றும் வடிவேலு நடிப்பில் மாமன்னன் ஆகிய படங்களை இவர் இயக்கியிருக்கிறார். அடுத்ததாக வாழை என்கிற வெப் சீரீஸ் இயக்கியுள்ளார் மாரி செல்வராஜ். அர்ஜுனா விருது வென்ற கபடி வீரரான மணத்தி கணேசன் அவர்களின் வாழ்க்கையை மையப்படுத்திய படத்தைதான் இயக்குனர் மாரி செல்வராஜ் படமாக்கவிருக்கிறார். இந்த படத்தில் மணத்தி கணேசனாக நடிகர் துருவ் விக்ரம் நடிக்கிறார். இந்த படத்திற்கான அறிவிப்பு துருவ் விக்ரம் பிறந்தநாளான செப்டம்பர் 23ஆம் தேதி ஒரு போஸ்டருடன் வெளியானது.
துருவ் விக்ரம், ஆதித்ய வர்மா, வர்மா, மகான் உள்ளிட்ட படங்களை நடித்தபிறகு தற்போது இந்த படத்தில் கமிட் ஆகியிருக்கிறார். மாரி செல்வராஜின் முந்தைய படங்களும் வசூல் மற்றும் விமர்சன ரீதியாக ஹிட் பெற்றதால் இந்த படத்திற்கு எக்கச்சக்கமான எதிர்பார்ப்பு நிலவி வருகிறது. மணத்தி கணேசனின் வாழ்க்கை படம் மாரி செல்வராஜ் மட்டுமன்றி நடிகர் துருவ் விக்ரமுக்கும் முதல் பயோ படமாகும். அதனாலயே இந்த படத்திற்கான வேலைபாடுகளில் அதிகப்படியான கவனத்தை கொடுத்து வருகிறார்கள். மாரி செல்வராஜ் மற்றும் துருவ் விக்ரமின் இந்த புதிய படத்தை இயக்குனர் பா.ரஞ்சித் அவருடைய நீலம் ப்ரடக்ஷன்ஸ் நிறுவனத்தின் மூலம் தயாரிக்கிறார்.
இந்த படத்தில் கபடி வீரராக நடிக்கவிருக்கும் நடிகர் துருவ் விக்ரம் ஒரிஜினல் மணத்தி கணேசனிடமே பயிற்சி பெற்று வருகிறாராம். கடந்த செப்டம்பர் மாதமே அறிவிக்கப்பட்ட இந்த படத்தின் நிலவரத்தை ரசிகர்கள் தொடர்ந்து கேட்டு வரும் நிலையில் இந்த படத்திற்கான சூட்டிங் அப்டேட் வெளியாகியுள்ளது. மணத்தி கணேசனிடம் கபடி விளையாட்டுக்கான பயிற்சி எடுத்து வரும் துருவ் இப்போது நன்றாக பயிற்சி பெற்றுவிட்டாராம். அந்த வகையில் வரும் மார்ச் மாதத்தில் இந்த புதிய படத்தின் படப்பிடிப்பை துவங்கவிருக்கிறதாம் படக்குழு. மேலும் இந்த படத்தில் நடிக்கவிருக்கும் மற்ற நடிகர்கள் குறித்தும் பிற தொழில்நுட்ப கலைஞர்கள் குறித்த அறிவிப்பு அடுத்துவரும் தினங்களில் வெளியாகும் எனவும் எதிர்பார்க்கப்படுகிறது.