அண்ணா பல்கலைக்கழகத்தின் உறுப்புக் கல்லூரிகளில் தமிழ் வழி பொறியியல் பாடப் பிரிவுகள் தற்காலிகமாக நீக்கப்படுவதாக வெளியிட்ட அறிவிப்பை அண்ணா பல்கலைக்கழகம் திரும்பப் பெற்றுள்ளது. தனது உறுப்பு கல்லூரிகளில் எந்த பாட பிரிவும் நீக்கப்படாது என்றும் அண்ணா பல்கலைக்கழகம் தெரிவித்துள்ளது.
அண்ணா பல்கலைக்கழகத்தின் கீழ் 16 உறுப்பு கல்லூரிகள் செயல்பட்டு வருகின்றன. இந்நிலையில் அண்ணா பல்கலைக்கழகத்தின் 11 உறுப்பு கல்லூரிகளில் தமிழ் மற்றும் ஆங்கில வழி பாடப்பிரிவுகள் நீக்கப்படுவதாக அண்ணா பல்கலைக்கழகம் அறிவிப்பு வெளியிட்டிருந்தது. பிஇ எனப்படும் இளங்கலை பொறியியல் பாடப்பிரிவில் செயல்பட்டு வரும் மெக்கானிக்கல் மற்றும் சிவில் பாடப் பிரிபுகளை தற்காலிகமாக நீக்குவதாக அண்ணா பல்கலைக்கழகம் அறிவித்தது. இதேபோல் ஆங்கில வழி சிவில் மற்றும் மெக்கானிக்கல் பாடப்பிரிவுகளும் மூடப்படுவதாக அண்ணா பல்கலைக்கழகம் தெரிவித்தது. ஆரணி, திண்டிவனம், விழுப்புரம், திண்டுக்கல், ராமநாதபுரம், அரியலூர், பண்ருட்டி, பட்டுக்கோட்டை, திருக்குவளை, நாகர்கோயில், தூத்துக்குடி ஆகிய 11 உறுப்புக்கல்லூரிகளில் இளங்கலை பொறியியல் படிப்புகளுக்கான சேர்க்கை நிறுத்தப்பட்டுள்ளதாகவும் அறிக்கை வெளியிட்டது.
அண்ணா பல்கலைக்கழகத்தின் இந்த முடிவுக்கு மக்கள் மத்தியில் கடும் எதிர்ப்பு எழுந்தது. தமிழக பாஜக தலைவர் அண்ணாமலை, இது தமிழ் மொழியை புறக்கணிக்கும் திமுக அரசின் செயல் என கண்டனம் தெரிவித்தார். இந்நிலையில் தமிழ் வழி பாடப்பிரிவுகள் நீக்கப்படுவதாக வெளியான அறிவிப்பை வாபஸ் பெறுவதாக அண்ணா பல்கலைக்கழக துணை வேந்தர் வேல்ராஜ் தெரிவித்துள்ளார். மேலும் அண்ணா பல்கலைக்கழகத்தின் உறுப்பு கல்லூரிகளில் எந்த பாடப்பிரிவும் நீக்கப்படாது என்றும், உயர்க்கல்வித்துறை அமைச்சர் உத்தரவின்படி ஏற்கனவே வெளியான அறிவிப்பு வாபஸ் பெறப்படுவதாக அண்ணா பல்கலைக்கழக துணைவேந்தர் வேல்ராஜ் தெரிவித்துள்ளார்.
பொதுமக்களின் கோரிக்கை மற்றும் அமைச்சரின் உத்தரவின் பேரில் ஏற்கனவே வெளியானன அறிவிப்பை வாபஸ் பெறுவதாக தெரிவித்துள்ளார். மேலும் நடப்பு கல்வி ஆண்டில் 11 உறுப்புக் கல்லூரிகளிலும் அனைத்து பாடப்பிரிவுகளுக்கும் மாணவர் சேர்க்கை நடைபெறும் என்றும் துணை வேந்தர் வேல்ராஜ் தெரிவித்துள்ளார். இதனை தற்காலிகமாக நிறுத்தி வைப்பது குறித்து அடுத்த ஆண்டு முடிவு செய்யப்படும் என்றும் அண்ணா பல்கலைக்கழக துணைவேந்தர் வேல்ராஜ் தெரிவித்துள்ளார்.