தமிழக அரசு மகளிருக்கு கொடுக்கும் ரூ.1000 உரிமைத் தொகையால் எந்தப் பயனும் இல்லை என்று கூறிய நாம் தமிழர் கட்சி தலைமை ஒருங்கிணைப்பாளர் சீமான், மக்களை பிச்சைக்காரர்களாக மாற்றியதுதான் திமுகவின் சாதனை என்று விமர்சித்தார்.
தனது முக்கிய தேர்தல் வாக்குறுதியான மகளிருக்கு ரூ.1000 உரிமைத் தொகை என்பதை கிட்டத்தட்ட இரண்டரை ஆண்டுகளுக்கு பிறகு திமுக அரசு இன்று செயல்படுத்தியுள்ளது. இந்தத் திட்டத்தின் கீழ் 1 கோடியே 6 லட்சம் குடும்பத் தலைவிகளுக்கு மாதந்தோறும் ரூ.1000 வழங்கப்படவுள்ளது. முதல்கட்டமாக, தகுதியான குடும்பத் தலைவிகளுக்கு ரூ.1000 அவரவர் வங்கிக்கணக்குகளில் நேரடியாக செலுத்தப்பட்டது.
இந்நிலையில், இந்த திட்டத்தை நாம் தமிழர் கட்சி தலைமை ஒருங்கிணைப்பாளர் சீமான் கடுமையாக விமர்சித்துள்ளார். இதுகுறித்து செய்தியாளர்களிடம் அவர் கூறியதாவது:-
இதை ஒரு சாதனையான திட்டம் என்றோ, மக்களுக்கான சேவை என்றோ கூறுவதை எப்படி ஏற்பது? அரை நூற்றாண்டுகளாக தமிழ்நாட்டை திமுகவும், அதிமுகவும் தான் மாறி மாறி ஆட்சி செய்திருக்கின்றன. மாதம் 1000 ரூபாய் என்பது மிக அற்பமான தொகை. அதற்கு கூட என் மக்களை கேயேந்த வைக்கிற நிலையில் தான் இவர்கள் வைத்திருக்கிறார்கள்.
யாரு இப்போ உங்களிடம் வந்து பணம் கேட்டது? யாருமே கேட்கவில்லையே. எங்க அம்மாவோ, பெரியம்மா, சின்னம்மாவோ யாருமே கேட்கவில்லையே. நல்ல சாலையை கொடுங்க. குடிக்க சுத்தமான தண்ணீரை இலவசமாக கொடுங்க. இதை பண்ணுங்க முதல்ல. இந்த 1000 ரூபாயை நீங்களே வெச்சுக்கோங்க. இந்த 1000 ரூபாயை வெச்சிட்டு பெண்கள் என்ன செய்யப் போகிறார்கள்? ஒன்னும் கிடையாது. இன்னைக்கு 1000 ரூபாய்க்கு கையேந்துகிற என் மக்கள், இன்னும் கொஞ்சம் காலம் கழிச்சு 5000 ரூபாய்க்கு கையேந்தணுமா? இதுதான் வளர்ச்சியா? என் மக்களை பிச்சைக்காரர்களாக மாத்திட்டீங்களே. இவ்வாறு சீமான் கூறினார்.