சென்னை அமைந்தகரையில் அரசு பேருந்து ஒன்றின் ஓட்டை வழியாக பெண் பயணி கீழே விழுந்த சம்பவத்திற்கு தமிழக பாஜக தலைவர் அண்ணாமலை கடும் கண்டனம் தெரிவித்துள்ளார்.
திருவேற்காடு செல்லும் பெண்களுக்கான கட்டணமில்லா அரசு பேருந்து ஒன்று சென்னை அமைந்தகரை பகுதியில் சென்று கொண்டிருந்தது. அந்த பேருந்தின் கடைசி இருக்கை அருகே அமர்ந்திருந்த பெண் பயணி ஒருவர் திடீரென அந்த இருக்கையின் அருகே இருந்த ஓட்டை வழியாக சாலையில் விழுந்தார். பெண்ணின் அலறல் சத்தம் கேட்டு ஓட்டுநர் உடனடியாக பேருந்தை நிறுத்தினார். இந்த விபத்தில் அந்த பெண் நல் வாய்ப்பாக உயிர் பிழைத்தார். இந்த சம்பவம் பெரும் பரபரப்பை ஏற்படுத்தியுள்ளது. பேருந்தில் இருந்த ஓட்டையை சீரமைக்காமல் பலகையை வைத்து மூடி பேருந்தை இயக்கியதும் தெரியவந்துள்ளது.
இந்நிலையில் இந்த சம்பவம் குறித்து தமிழக பாஜக தலைவர் அண்ணாமலை தனது சமூக வலைதளப் பக்கத்தில் பதிவிட்டுள்ளார். அதில், சென்னை திருவேற்காட்டில் இருந்து, வள்ளலார் நகர் செல்லும் தடம் எண் 59 பேருந்தில், இருக்கையில் அமர்ந்திருந்த சகோதரி ஒருவர், இருக்கையின் கீழ் இருந்த பலகை உடைந்து, ஓடிக்கொண்டிருந்த பேருந்தில் இருந்து கீழே விழுந்து, அதிர்ஷ்டவசமாக உயிர் தப்பியுள்ளார் என குறிப்பிட்டுள்ளார்.
தமிழகத்தில் திமுக அரசு நிர்வாகம் என்ன நிலைமையில் செயல்பட்டு வருகிறது என்பதற்கு இது ஒரு எடுத்துக்காட்டு என்றும், சரியாகப் பராமரிக்கப்படாத பேருந்துகளால், மழைக் காலங்களில் பேருந்திற்குள் தண்ணீர் ஒழுகுவது, பழுதடைந்த இருக்கைகள் என, அரசுப் பேருந்துகளில் பயணிக்கும் பொதுமக்களின் உயிருக்குக் கூட பாதுகாப்பு இல்லாத நிலையில் இன்று போக்குவரத்துத் துறை முற்றிலுமாகச் செயலிழந்து இருக்கிறது என்றும் குற்றம்சாட்டியுள்ளார்.
போக்குவரத்துத் துறை மட்டுமல்ல, ஒவ்வொரு தமிழக அரசுத் துறைகளும் இதைப் போன்ற பரிதாப நிலையில்தான் இருக்கின்றன என தெரிவித்துள்ள அண்ணாமலை, மக்களின் வரிப்பணம் முழுவதும் எங்கு செல்கிறது என்ற கேள்வி எழுந்திருக்கிறது என்றும் தெரிவித்துள்ளார். போக்குவரத்துத் துறையில் என்னென்ன விதங்களில் ஊழல் செய்யலாம் என்று சிந்திக்கும் அமைச்சர், அரசுப் பேருந்துகளைப் பராமரிப்பதிலும் கவனம் செலுத்த வேண்டும் என்றும் அண்ணாமலை தனது பதிவில் குறிப்பிட்டுள்ளார்.