விஜய் கட்சியின் ஆங்கில சுருக்கெழுத்து பெயருக்கு எதிராக தேர்தல் ஆணையத்தை அணுக உள்ளதாக வேல்முருகன் கூறியுள்ளார்.
தமிழ்த் திரையுலகில் உச்ச நட்சத்திரங்களில் ஒருவராக வலம் வரும் நடிகர் விஜய் அரசியல் கட்சி தொடங்கியுள்ளார். தமிழக வெற்றி கழகம் என பெயரிட்டுள்ள அவர் 2024 மக்களவைத் தேர்தலில் போட்டியிடவில்லை என்றும், 2026 சட்டமன்றத் தேர்தலில் களமிறங்க உள்ளதாகவும் அறிக்கை வாயிலாக கூறியுள்ளார். விஜய் தனது கட்சிப் பெயரை பிப்ரவரி 2ஆம் தேதி டெல்லியில் உள்ள தலைமைத் தேர்தல் ஆணைய அலுவலகத்தில் புஸ்ஸி ஆனந்த் பதிவு செல்வதற்காக சென்றிருந்தார். அடுத்த சில நிமிடங்களிலேயே விஜய்யிடம் இருந்து கட்சி தொடங்குவதான அறிவிப்பும், கட்சிப் பெயரும் அதிகாரபூர்வமாக வெளியிடப்பட்டது.
கட்சிப் பெயரில் தமிழ்நாடு என வராமல் தமிழகம் என குறிப்பிட்டது விமர்சனத்துக்கு உள்ளானது. ‘க்’ என்ற ஒற்றெழுத்து போடாததும் சர்ச்சையானது. அதேபோல் ஆங்கிலத்தில் கட்சிப் பெயரை சுருக்கி கூறும் போது TVK என்று குறிப்பிடும் படி உள்ளது. இதே பெயரில் தான் வேல்முருகனின் தமிழக வாழ்வுரிமைக் கட்சி அழைக்கப்படுகிறது. இது ஒருபுறமிருக்க கட்சியை பதிவு செய்த உடனே விஜய் கட்சிப் பெயரை வெளியிட்டிருக்க கூடாது. அதற்கு தேர்தல் ஆணையம் அனுமதி வழங்கிய பின்னர் பொதுக் கூட்டம் வைத்து கட்சிப் பெயரை அறிவித்திருக்கலாம். இல்லையேல் கட்சிப் பெயருக்கு எதிராக யாரும் தேர்தல் ஆணையத்தை அணுக நேரிடும் என்றும் பலர் கருத்து தெரிவித்தனர்.
தனது கட்சியின் சுருக்கெழுத்து டிவிகே என்றிருக்கும் நிலையில் விஜய் கட்சிக்கு கூடுதலாக ஒரு எழுத்தை சேர்க்க வலியுறுத்தி தேர்தல் ஆணையத்தை நாட உள்ளதாக வேல்முருகன் தெரிவித்துள்ளார். இது தொடர்பாக அவர் கூறியதாவது:-
அரசியல் கட்சியை தொடங்கி இருக்கும் நடிகர் விஜய்க்கு வாழ்த்துகள். சினிமாவில் இருந்து வரக்கூடிய ஒருவரை உடனே முதலமைச்சராக்க வேண்டுமா என்ற கேள்வியை தமிழக மக்கள் கேட்டுக் கொள்ள வேண்டும். ஏனெனில், மக்களுக்குப் பணி செய்ய வேண்டியதற்கான கால அவகாசத்தை அவர் எடுத்துக் கொள்ள வேண்டும். தமிழகத்தில் பல்வேறு பிரச்சினைகள் நடந்து கொண்டிருக்கிறது. அதில் எல்லாம் விஜய்யின் நிலைப்பாடு என்ன என்று நமக்குத் தெரிய வேண்டும். அதன் பிறகே, அவருக்கு வாக்களிப்பது குறித்து மக்கள் முடிவெடுக்க வேண்டும். மற்றபடி அவர் அரசியலுக்கே தகுதி இல்லாதவர் என்று சொல்ல முடியாது.
தமிழக வாழ்வுரிமை கட்சி என்ற எங்களது கட்சிப் பெயரின் ஆங்கில சுருக்கம் டிவிகே தான். நடிகர் விஜய்யின் கட்சிக்கும் அதுவே தான் ஆங்கில சுருக்கமாக இருக்கும். தேர்தல் ஆணையத்தில் விஜய் தனது கட்சியை பதிவு செய்துவிட்டதாக சொல்லப்படுகிறது. அப்படியானால், இரண்டு கட்சிக்கு ஒரே பெயர் என்பது சாத்தியமில்லாதது. ஆவணங்களைச் சரிபார்த்து விஜய் கட்சியின் ஆங்கில சுருக்கத்தில் கூடுதலாக ஒரு எழுத்தைச் சேர்க்கச் சொல்லி அவரை தேர்தல் ஆணையம் வலியுறுத்த வாய்ப்பு இருக்கிறது. அப்படி இல்லாத பட்சத்தில் நாங்கள் அதை வலியுறுத்தி ஆணையத்தில் மனு கொடுப்போம். இவ்வாறு அவர் கூறியுள்ளார்.