தங்கம் தென்னரசு வழக்கு மாதிரி குப்பனுக்கும் கருப்பனுக்கும் இப்படி செய்வீங்களா என்று கேள்விகளால் திணறடித்தார் நீதிபதி ஆனந்த் வெங்கடேசன்.
திமுக ஆட்சி நடந்த 2006 – 11 வரை பள்ளிக் கல்வித் துறை அமைச்சராக இருந்தவர் தங்கம் தென்னரசு. அதன்பிறகு அதிமுக ஆட்சிக்கு வந்த நிலையில், வருமானத்திற்கு அதிகமாக சொத்து சேர்த்ததாக தங்கம் தென்னரசு, அவரது மனைவி மணிமேகலை மீது லஞ்ச ஒழிப்புத் துறை 2012ஆம் ஆண்டு வழக்கு பதிவு செய்தது. விருதுநகர் மாவட்டம் ஸ்ரீவில்லிப்புத்தூரிலுள்ள நீதிமன்றத்தில் இந்த வழக்கு விசாரணை பல ஆண்டுகளாக நடைபெற்றது. இதனைத் தொடர்ந்து வழக்கில் இருந்து விடுவிக்கக் கோரி தங்கம் தென்னரசு மனுதாக்கல் செய்தார். அரசியல் பழிவாங்கும் நடவடிக்கையாக தனக்கு எதிராக வழக்கு தொடரப்பட்டுள்ளதாக அதில் குறிப்பிட்டு இருந்தார். இவ்வழக்கை விசாரித்த ஸ்ரீவில்லிப்புத்தூர் நீதிமன்றம், 2022ஆம் ஆண்டு ஆண்டு டிசம்பர் மாதம் தங்கம் தென்னரசு மற்றும் அவரது மனைவியை வழக்கில் இருந்து விடுவித்து உத்தரவு பிறப்பித்தது.
ஆனால், தங்கம் தென்னரசுவை விடுவித்த உத்தரவை சென்னை உயர் நீதிமன்ற நீதிபதி ஆனந்த் வெங்கடேசன் தாமாக முன்வந்து மறுஆய்வுக்கு எடுத்துக்கொண்டார். இந்த வழக்கின் இறுதி விசாரணை நேற்று முன்தினம் தொடங்கியது. தங்கம் தென்னரசுக்கு எதிரான சொத்துக் குவிப்பு வழக்கை விசாரித்த புலன் விசாரணை அதிகாரி பூமிநாதனை நேரில் ஆஜராக உத்தரவிட்டு நீதிபதி ஆனந்த் வெங்கடேசன் வழக்கை தள்ளிவைத்தார்.
இந்த வழக்கு நேற்று மீண்டும் விசாரணைக்கு வந்தது. அப்போது, தங்கம் தென்னரசு தரப்பில் ஆஜரான வழக்கறிஞர், “தமிழ்நாட்டில் ஆட்சி மாற்றத்துக்குப் பின் பழிவாங்கும் நோக்குடன் இந்த வழக்குப் பதிவு செய்யப்பட்டது. இதில் நியாயமான விசாரணை நடத்தப்பட்டு இருக்க வேண்டும். ஆனால், ஆதாரங்களைப் புறக்கணித்து விட்டு வழக்கு தொடர்வதை எப்படி நியாயமான விசாரணையாகக் கருத முடியும். வழக்குப் பதிவு செய்வதற்கு முன்னர் தாக்கல் செய்யப்பட்ட வருமான வரி கணக்கை பரிசீலனை செய்திருக்க வேண்டும்” என்று வாதிட்டார்.
தொடர்ந்து, “வழக்கில் முதல் புலன் விசாரணை அதிகாரி சேகரித்த ஆதாரங்கள் எதையும் மாற்றாமல், கூடுதல் ஆதாரங்களை சேர்ப்பது என்பது மறு விசாரணை இல்லை. மேல் விசாரணை தான். இந்த மேல் விசாரணையும், எஸ்.பி ஒப்புதலைப் பெற்றே மேற்கொள்ளப்பட்டது. மேல் விசாரணைக்கு பின்னர் குற்றம் சாட்டப்பட்டவர்களுக்கு எதிராக ஆதாரங்கள் இல்லை என வழக்கை முடித்து அறிக்கை தாக்கல் செய்தால் குற்றம் சாட்டப்பட்டவர்களை நீதிமன்றம் விடுவிக்கலாம்” என்றும் வாதங்களை அடுக்கினார்.
இதனைத் தொடர்ந்து புலன் விசாரணை அதிகாரி பூமிநாதனை நோக்கி எத்தனை ஆண்டுகளாக ஊழல் தடுப்புச் சட்ட வழக்குகளை விசாரிக்கிறீர்கள்? என நீதிபதி வினா எழுப்பினார். ஏழு ஆண்டுகளாக ஊழல் தடுப்பு சட்ட வழக்குகளை புலன் விசாரணை செய்து வருவதாகப் பூமிநாதன் பதில் தெரிவித்தார்.
இதனைக் கேட்ட நீதிபதி, “இந்த ஏழு ஆண்டுகளில் வழக்கில் இருந்து விடுவிக்கக் கோரிய மனுவின் மீது தாக்கல் செய்யப்பட்ட எழுத்துப்பூர்வமான வாதத்தின் அடிப்படையில் மேல் விசாரணை நடத்தியிருக்கிறீர்களா? 2016ஆம் ஆண்டு விடுவிக்க கோரிய மனு விசாரணைக்கு உகந்ததல்ல என்று பதில் மனு தாக்கல் செய்யும் போது மேல் விசாரணை நடத்த தோன்றவில்லையா? 2021ஆம் ஆண்டு திடீரென மேல் விசாரணை செய்ய வேண்டும் என தோன்றியது ஏன்” என அடுக்கடுக்காக கேள்விகளை முன்வைத்தார்.
இதற்கு பதிலளித்த அதிகாரி பூமிநாதன், வழக்கில் இருந்து விடுவிக்கக் கோரி குற்றம் சாட்டப்பட்டவர்கள் தரப்பில் தாக்கல் செய்யப்பட்ட எழுத்துப்பூர்வ வாதத்தின் அடிப்படையில் மேல் விசாரணை கோரப்பட்டது என்று தெரிவித்தார். இதனையடுத்து விசாரணை அறிக்கையில் மேற்கோள் காட்டப்பட்ட ஆறு தீர்ப்புகளை சுட்டிக்காட்டிய நீதிபதி, ஒவ்வொரு தீர்ப்பையும் விளக்குங்கள் என்று கூறினார். தனக்கு தெரியாது என அதிகாரி பதிலளிக்க, “உங்கள் விசாரணை அறிக்கையில்தானே உள்ளது. உங்களுக்கே தெரியாதா” என்று கேள்வி கேட்டார்.
மேலும், இதே நடைமுறையைச் சாதாரண வழக்குகளில் பின்பற்றுவீர்களா என்றும் குப்பனுக்கும் கருப்பனுக்கும் இதே நடைமுறையை பின்பற்றுவீர்களா எனவும் கேள்வி எழுப்பிய நீதிபதி, லஞ்ச ஒழிப்புத் துறை வாதத்திற்காக வழக்கின் விசாரணையை வரும் மார்ச் 8ஆம் தேதிக்கு தள்ளிவைத்தார்.