விழுப்புரம் நாடாளுமன்ற தொகுதியில் வேட்பாளராக அதிமுக சார்பில் இரட்டை இலை சின்னத்தில் பாக்யராஜ் போட்டியிடுகிறார். இவருக்கு ஆதரவாக விழுப்புரம் தொகுதிக்கு உட்பட்ட திருக்கோவிலூர் சந்தைப்பேட்டை பகுதியில் நடிகையும், அதிமுக கழக கொள்கை பரப்பு இணைச் செயலாளருமான விந்தியா, இரட்டை இலை சின்னத்திற்கு வாக்கு சேகரித்தார். அப்பொழுது நடிகை விந்தியா பேசியதாவது:-
மக்கள் வரிப் பணத்தில் கொள்ளையடித்து இன்றைக்கு பெயில் வாங்கி ஓசி வாழ்க்கை வாழ்கிறார் இந்த பொன்முடி. மக்களை பார்த்து கெட்ட வார்த்தைகளை பேசும் பொன்முடிக்கு நீங்கள் தக்க பாடம் புகட்ட வேண்டும். திமுக என்றாலே இன்றைக்கு தமிழ்நாடு மக்கள் மிகவும் கோபத்திலும், வெறுப்பிலும் இருக்கிறார்கள். ஆனால் ஓசியில் வாழ்கின்ற பொன்முடி தனது மகனை களத்தில் இறக்காமல், மாற்றுக் கட்சியை சேர்ந்தவரை இறக்கி உள்ளார். திமுகவை நம்புவதற்கு தமிழர் யாரும் இன்றைக்கு முட்டாள் கிடையாது. திமுகவை நம்பி ஒரு கூட்டணி அமைத்துள்ளார்கள் அந்த கூட்டணி குறித்து நீங்கள் புரிந்து கொள்ள வேண்டும்.
திமுக கூட்டணி என்றால் இன்றைக்கு நாம் புரிந்து கொள்ள வேண்டியது என்னவென்றால் கரகாட்டக்காரன் படத்தில் வரும் காட்சி போல ஒருவர் வண்டியை தள்ளிட்டு செல்வார், அப்பொழுது அந்த வண்டியில் சென்ற பொழுது ஒருவர் ஈயம் பித்தளைக்கு பேரிச்சம்பழம் என கூவிக்கொண்டே வருவார். அதுபோன்றுதான் அந்த பல கட்சி கூட்டணி உள்ளது.
இன்றைக்கு மானஸ்தன் என திமுக கூட்டணியில் ஒருவர் சொல்லித் திரிகிறார். அது யார் என்று பார்த்தால் கமல்ஹாசன். எவ்வளவு சுமாரான துணி வாங்கினாலும் சாயம் போகும், ஆனால் தண்ணீரில் படாமலே சாயம் போகுபவர் கமலஹாசன். இன்றைக்கு கூட்டணிக்காக ஸ்டாலின் மகன் உதயநிதியிடம் கைகட்டி நிற்கிறார். கூட்டணி பேச்சுவார்த்தை நடத்தி வெளியே வந்த கமலஹாசனிம் அவரின் கட்சித் தொண்டர்கள், என்ன தலைவா எத்தனை தொகுதி? எத்தனை இடங்கள்? என கேட்டதற்கு நமது சின்னத்தில் தானே போட்டியிடப் போகிறோம்? என கேட்டதற்கு, ஆம் டார்ச் லைட் சின்னத்தில் தான் என்று சொல்லிவிட்டு, ஆனால் டார்ச் லைட்டை கையில் பிடித்து இருக்கச் சொன்னார்கள் என்றாராம். இன்றைக்கு இதுபோன்று பேசும் கமலஹாசன் எவ்வளவு ஒரு முட்டாள்தனம் என்று நீங்களே புரிந்து கொள்ள வேண்டும். இவ்வாறு விந்தியா பேசினார்.