ஆளுநரும் திமுக அரசும் தற்போது ஒன்றாகிவிட்டதாக முன்னாள் அமைச்சர் ஜெயக்குமார் கருத்து தெரிவித்துள்ளார்.
தமிழகத்தில் கடந்த சில நாட்களாக கனமழை பெய்து வருகிறது. சென்னையில் நேற்று முன் தினம் தொடங்கிய மழை, நேற்று முழுவதும் கொட்டித் தீர்த்தது. அதிகப்படியான மழை காரணமாக சாலைகளில் தண்ணீர் தேங்கியது. தமிழக அரசு துரித நடவடிக்கை எடுத்து மோட்டார் இயந்திரங்கள் மூலம் உடனுக்குடன் தண்ணீரை அகற்றியது. தமிழக அரசின் மழை மீட்பு நடவடிக்கைகள் தொடர்பாக பாராட்டு தெரிவித்த ஆளுநர் ஆர்.என்.ரவி, தமிழகத்தில் மழை பாதிப்புகளை சரிசெய்ய தமிழ்நாடு அரசு அனைத்து சாத்தியமான வழிகளிலும் முயற்சித்து வருகிறது என்று குறிப்பிட்டு இருந்தார். இதுதொடர்பாக தமிழக அரசின் மீது அதிமுகவினர் விமர்சனங்களை முன்வைத்து வருகிறார்கள்.
இந்த நிலையில் வட சென்னை பகுதியில் மழை, வெள்ள பாதிப்புப் பகுதிகளை முன்னாள் அமைச்சர் ஜெயக்குமார் இன்று பார்வையிட்டு ஆய்வு செய்தார். பின்னர் செய்தியாளர்களை சந்தித்த ஜெயக்குமார் கூறியதாவது:-
சென்னையில் தண்ணீர் தேங்காததுதான் வெள்ளை அறிக்கை என உதயநிதி ஸ்டாலின் சிறுபிள்ளைத்தனமாக கூறியுள்ளார். இதனை பொறுப்புள்ள துணை முதல்வர் கூறும் பதிலாக எடுத்துக்கொள்ள முடியாது. தண்ணீர் தேங்காமல் இருந்ததற்கு திமுக அரசின் எடுத்த நடவடிக்கைகள் காரணம் அல்ல. மழை குறைவாக பெய்ததால் சாலைகளில் தண்ணீர் தேங்காமல் சென்றுவிட்டது. ரெட் அலெர்ட் கொடுத்த இன்றைய தினம் கடும் மழை பெய்திருந்தால் திமுக அரசின் சாயம் வெளுத்திருக்கும்.
அம்மா உணவகத்தில் உணவு இலவசம் என்று அறிவிப்பு வெளியிட்டார்கள். ஆனால், வெறும் 300 பேருக்கு மட்டும் உணவு தயாரித்து விநியோகித்துவிட்டு பல இடங்களில் அம்மா உணவகங்களை 12 மணியுடன் மூடிவிட்டார்கள். முதல்வர் மு.க.ஸ்டாலினின் கொளத்தூர் தொகுதியில் கூட மழையால் மக்கள் புலம்புகிறார்கள்.
ஆளுநர் அரசை பாராட்டியுள்ளாரே என்ற கேள்விக்கு, “ஆளுநரும் அரசும் ஒன்றாகிவிட்டார்கள். நேற்று வரை ஆளுநர் ஒழிக என்று சொன்னவர்கள் இன்று ஆளுநர் வாழ்க என்று சொல்லும் அளவுக்கு அரசு நிலைப்பாட்டை மாற்றியுள்ளது. டெல்லியில் ஆளுநரை கொஞ்சம் அட்ஜஸ்ட் செய்துகொள்ளுங்கள் என ஸ்டாலினிடம் சொல்லி இருப்பார்கள். இதனை ஏற்று ஆளுநரிடம் இனி அனுசரித்துப் போவதாக பிரதமரிடம் திமுக ஒப்பந்தம் போட்டுள்ளது. அதன் முதல் கட்டமாகவே பொன்முடியை உயர்கல்வித் துறையில் இருந்து மாற்றினர்” என்றும் ஜெயக்குமார் கூறினார்.