ஆட்சி அதிகாரத்தில் பங்கு என்று தவெக மாநாட்டில் விஜய் பேசியதற்கு விசிக நிர்வாகி ஆதவ் அர்ஜுன் வாழ்த்து தெரிவித்துள்ளார்.
தமிழக வெற்றிக் கழகத்தின் முதல் மாநில மாநாடு நேற்று பிற்பகல் விக்கிரவாண்டியில் அதன் தலைவர் விஜய் தலைமையில் நடைபெற்றது. சுமார் 4 மணியளவில் மேடைக்கு வந்த விஜய், தொண்டர்களுக்கு வணக்கம் வைத்ததோடு, அவர்கள் வீசி எறிந்த கட்சித் துண்டை தனது தோளில் போட்டுக்கொண்டார். கட்சியின் கொள்கைகளாக மதச்சார்பின்மை, சமூக நீதி, இருமொழிக் கொள்கை ஆகியவை அறிவிக்கப்பட்டன. ஆளுநர் பதவியை அகற்ற வேண்டும் உள்ளிட்ட செயல்திட்டங்களும் வகுக்கப்பட்டுள்ளன. இறுதியாக உரையாற்றிய விஜய், திமுக மற்றும் பாஜகவை விமர்சன்ம் செய்தார். பாஜகவை சித்தாந்த எதிரி என்றும், திமுகவை அரசியல் எதிரி என்றும் குறிப்பிட்டார்.
மேலும் பேசிய விஜய், “தவெகவையும் அதன் செயல்பாட்டையும் நம்பி நம்மோடு சிலர் வரலாம் இல்லையா? அப்படி வரவங்கள அரவணைக்கனும் இல்லையா? நம்மை நம்பி களம் காண வரவங்களுக்கு ஆட்சி மற்றும் அதிகாரத்தில் பங்களிப்புதந்து, அதிகாரப் பகிர்வு செய்யப்படும். 2026ம் ஆண்டு ஒரு புதிய அரசியல் களத்தின் புத்தாண்டு” என்று தெரிவித்தார்.
முன்னதாக கூட்டணி ஆட்சி, ஆட்சி அதிகாரத்தில் பங்கு என்ற திருமாவளவன் பழைய பேச்சு சமூக வலைதளங்களில் வெளியாகி அரசியல் அரங்கில் பேசுபொருளானது. இந்த நிலையில் அதனையே தனது தவெக மாநாட்டில் வாக்குறுதியாக விஜய் வழங்கியுள்ளார்.
இதுதொடர்பாக விசிக துணை பொதுச் செயலாளர் ஆதவ் அர்ஜூன் தனது எக்ஸ் பக்கத்தில், ஆட்சியிலும் பங்கு அதிகாரத்திலும் பங்கு என்ற எங்கள் அரசியல் நிலைப்பாட்டிற்கு ஆதரவான குரல்கள் தமிழ்நாட்டில் ஒலிக்க ஆரம்பித்துள்ளன எதிர்கால தமிழ்நாடு அரசியல் களம் அந்த கருத்தை முன்வைத்தே பயணப்படும் நிலைக்கு வந்துள்ளது என்று தெரிவித்துள்ளார்.
அதிகாரத்தில் அனைவருக்கும் சமமான பங்கு என்பது அடிப்படை உரிமை என்பதைத் தனது முதல் மாநாட்டு உரையில் உணர்ந்து பேசியிருக்கிறார் சகோதரர் விஜய் என்று கூறிய ஆதவ் அர்ஜுன், “அவருக்கு வாழ்த்துகள். எல்லோருக்கும் எல்லாம் என்ற அரசியலை முன்னெடுக்க, அனைவருக்கும் சமமான வாய்ப்பு என்பதே இனி எதிர்காலத்தின் அரசியல் கருத்தியல். தமிழ்நாடு அரசியல் களம் புதிய பாதையை நோக்கிப் பயணப்படும்” என்றும் குறிப்பிட்டுள்ளார்.