டெல்லியில் நடந்த எரிசக்தி துறை அமைச்சர்கள் மாநாட்டில் பங்கேற்று பேசிய மின்சாரத்துறை அமைச்சர் செந்தில் பாலாஜி, தமிழக நலன் சார்ந்து பல்வேறு கோரிக்கைகளை முன்வைத்தார்.
டெல்லியில் இன்று (நவம்பர் 12) அனைத்து மாநில, யூனியன் பிரதேசங்களின் எரிசக்தித் துறை அமைச்சர்கள் மாநாடு நடைபெற்றது. இதில் தமிழக அரசு சார்பில் மின்சாரத்துறை அமைச்சர் செந்தில் பாலாஜி கலந்து கொண்டார். இந்த மாநாட்டில் அவர் பேசியதாவது:-
தமிழ்நாடு மின் உற்பத்தி மற்றும் பகிர்மானக் கழகத்தின் ஆண்டு வட்டிச் சுமை சுமார் 16,000 கோடி ரூபாயாக இருந்தது. தமிழ்நாடு அரசின் தொடர்ச்சியான முயற்சிகள் மற்றும் சீர்திருத்த நடவடிக்கைகளின் காரணமாக, ஆண்டு வட்டி விகிதம் 10.5% அளவிற்குக் கொண்டு வரப்பட்டுள்ளது. மாநில மின் நிறுவனங்களின் நிதி மற்றும் செயல்பாட்டுத் திறனை மேம்படுத்துவதில் தமிழ்நாடு காட்டியுள்ள அர்ப்பணிப்பைக் கருத்தில் கொண்டு, ஒன்றிய அரசின் நிதி நிறுவனங்களான REC மற்றும் PFC ஆகியவற்றின் வட்டி விகிதங்களை 8% ஆகக் குறைத்திடுமாறு கேட்டுக் கொள்கிறேன்.
புதிய துணை மின் நிலையங்களை நிறுவுதல் மற்றும் மேம்பாட்டு பணிகள் உட்பட மின் கட்டமைப்பு நவீனமயமாக்கலுக்காக 3,246 கோடி ரூபாய் மதிப்பிலான திட்ட கருத்துரு ஒன்றிய மின்சார அமைச்சகத்திற்கு அனுப்பப்பட்டுள்ளது. மாநிலத்தின் வேகமான பொருளாதார வளர்ச்சி மற்றும் அதிகரித்து வரும் மின் தேவைகளுக்கேற்ப விநியோக அமைப்பை வலுப்படுத்த இந்தக் கருத்துரு மீது விரைவாக ஒப்புதல் வழங்குமாறும் கேட்டுக் கொள்கிறேன்.
புதுப்பிக்கத்தக்க எரிசக்தி துறையில் சூரிய பூங்காக்கள், நீர்மின் சேமிப்பு திட்டங்கள், SECI மூலமாக மின்கல எரிசக்தி சேமிப்பு அமைப்பு (BESS) நிறுவுதல் ஆகியவை மேற்கொள்ளப்பட்டு வருகின்றன. தமிழ்நாட்டின் கடலோரப் பகுதியில் 35 ஜிகாவாட் அளவுக்கு கடல் காற்றின் மூலம் மின்சாரம் உற்பத்தி செய்ய இயலும் என மதிப்பிடப்பட்டுள்ளது. கடலோர காற்றாலை மின்சாரத்தை வெளியேற்றுவதற்காக கடலோர துணை மின்நிலையம் மற்றும் அதனுடன் தொடர்புடைய கடல் கேபிள் / மின் பரிமாற்ற கம்பிகள் தமிழகத்திற்குள் மட்டுமே அமைக்கப்பட உள்ளது.
NIWE, OWPD பிரதிநிதிகள் மற்றும் மாநில அரசுத் துறைகள் (தொழில்கள், மீன்வளம், எரிசக்தி மற்றும் நெடுஞ்சாலைகள் போன்றவை) தலைமையில் ஒரு கூட்டுச் செயற்குழு அமைக்கப்பட வேண்டும் என்று இவ்வேளையில் கேட்டுக் கொள்கிறேன். இதுத்தவிர, கடலோர காற்றாலைகளில் இருந்து உற்பத்தி செய்யப்படும் மின்சாரத்தை, செலவு மற்றும் வரி இழப்பை மிச்சப்படுத்த, மத்திய மின் இணைப்புக்கு பதிலாக, மாநில மின் வலையமைப்புகள் வாயிலாக தமிழ்நாடு வழியாக மட்டுமே வெளியேற்றப்பட வேண்டும். இவ்வாறு அமைச்சர் செந்தில் பாலாஜி பேசினார்.