தமிழக காங்கிரஸ் கமிட்டியின் முன்னாள் தலைவரும், தற்போதைய எம்.எல்.ஏவுமான ஈவிகேஎஸ் இளங்கோவன் உடல்நலக் குறைவு காரணமாக மருத்துவமனையில் அனுமதிக்கப்பட்டுள்ளார்.
காங்கிரஸ் எம்.எல்.ஏ ஈவிகேஎஸ் இளங்கோவன் திடீர் உடல்நலக் குறைவு காரணமாக சென்னையில் உள்ள தனியார் மருத்துவமனையில் அனுமதிக்கப்பட்டுள்ளார். அவருக்கு மருத்துவர்கள் தொடர் சிகிச்சை அளித்து வருகின்றனர். இதுதொடர்பாக விசாரிக்கையில் ஈவிகேஎஸ் இளங்கோவனுக்கு நிமோனியா பாதிப்பு ஏற்பட்டிருப்பதாக சொல்லப்படுகிறது. எனினும் மருத்துவமனை தரப்பில் இருந்து அதிகாரப்பூர்வ அறிவிப்பு வெளிவரும் வரை காத்திருக்க வேண்டியுள்ளது. இவரது உடல்நிலை குறித்த செய்திகளை காங்கிரஸ் கட்சியினர் கவனித்து வருகின்றனர்.
எம்.எல்.ஏ, எம்.பி, தமிழக காங்கிரஸ் கமிட்டி தலைவர் எனப் பல்வேறு பதவிகளை வகித்தவர் ஈவிகேஎஸ் இளங்கோவன். இவருடைய மகன் திருமகன் ஈவேரா திடீர் உடல்நலக் குறைவால் உயிரிழந்த நிலையில் ஈரோடு கிழக்கு சட்டமன்ற தொகுதி காலியானது. இதில் போட்டியிட்ட ஈவிகேஎஸ் இளங்கோவன் 66 ஆயிரத்திற்கும் அதிகமான வாக்குகளை பெற்று எம்.எல்.ஏவாக வெற்றி பெற்றார்.
இதையடுத்து கடந்த ஆண்டு மார்ச் மாதம் திடீர் நெஞ்சு வலி காரணமாக ஐசியூவில் அனுமதிக்கப்பட்டார். மருத்துவர்கள் தொடர்ந்து சிகிச்சை அளித்து வந்த நிலையில், ஓரிரு நாட்களில் சாதாரண வார்டுக்கு மாற்றப்பட்டார். அதன்பிறகு நல்ல உடல்நலத்துடன் எம்.எல்.ஏ பணிகளை மேற்கொண்டு வந்தார். இந்நிலையில் தான் நிமோனியா பாதிப்பு ஏற்பட்டு மருத்துவமனையில் சிகிச்சை பெற்று வருகிறார்.