தமிழக வாழ்வுரிமைக் கட்சியினர், “எந்த ஒரு அரசியல் கட்சி குறித்தோ, அமைப்பு குறித்தோ,அதன் தலைமைகள் குறித்தோ, அதன் பொறுப்பாளர்கள் குறித்தோ அவர்களை அவமதிக்கும் வகையில் தரக்குறைவாக விமர்சிக்கக் கூடாது” என்று அதன் தலைவர் பண்ருட்டி தி.வேல்முருகன் எம்.எல்.ஏ. உத்தரவிட்டுள்ளார்.
திருச்சியில் மாவீரர் நாள் பொதுக் கூட்டம் அண்மையில் நடைபெற்றது. நாம் தமிழர் கட்சியில் இருந்து விலகி தமிழர் ஒருங்கிணைப்பு இயக்கத்தை உருவாக்கியவர்கள் இந்த மாவீரர் நாள் பொதுக்கூட்டத்தை ஏற்பாடு செய்திருந்தனர். இந்தக் கூட்டத்தில் தமிழக வாழ்வுரிமைக் கட்சித் தலைவர் பண்ருட்டி தி.வேல்முருகன் சிறப்பரையாற்றினார். ஆனால் சீமான் பெயரை சொல்லாமல் மறைமுகமாக இந்தக் கூட்டத்தில் விமர்சித்திருந்தார் வேமுருகன்.
இந்த நிலையில் பண்ருட்டி தி.வேல்முருகன் வெளியிட்டுள்ள அறிக்கையில் கூறியுள்ளதாவது:-
தமிழக வாழ்வுரிமைக் கட்சியின் அனைத்து நிலை பொறுப்பாளர்களுக்கும் தொண்டர்களுக்கும் கண்டிப்பான வேண்டுகோள். தமிழ்நாட்டில் செயல்படும் எந்த ஒரு அரசியல் கட்சி குறித்தோ, அமைப்பு குறித்தோ, அதன் தலைமைகள் குறித்தோ, அதன் பொறுப்பாளர்கள் குறித்தோ பொதுவெளியிலோ, சமூக வலைத்தளங்களிலோ, காணொளிகளின் ஊடாகவோ, தனிப்பட்ட நேர்காணல்களின் மூலமாகவோ அவர்களை அவமதிக்கும் வகையில் தரக்குறைவாக விமர்சிக்கக் கூடாது.
நம் பணி என்பது உண்மையும் நேர்மையுமாக தமிழ்நாட்டு தமிழர்களுக்கும்,ஈழத் தமிழர்களுக்கும், உலகத் தமிழர்களுக்கும் பயன்படக்கூடிய வகையில் அவர்களின் உரிமைகளை காக்கும் வகையில் மட்டுமே இருக்க வேண்டுமே தவிர இது போன்ற குழு விவாதங்களில் ஈடுபடுவது அல்ல. இது போன்ற செயல்கள் தமிழர் உரிமைகளுக்காக போராடும் கட்சிகள் மற்றும் அமைப்புகளான நமது தொப்புள் கொடி உறவுகளுக்குள்ளேயே தேவையற்ற மன வருத்தங்களையும், பகைமைகளையும் மட்டுமே உருவாக்கும். இது நமது நோக்கமல்ல.
இதுவரையில் மற்ற அரசியல் கட்சிகள் மற்றும் அமைப்புகளின் பொறுப்பாளர்கள் நம்மை விமர்சித்திருந்தாலும் அதற்கு எதிர்வினையாக சில காணொளிகளும் முகநூல் பதிவுகளும் வெளியிடப்பட்டுள்ளதாக அறிகிறேன். அது போன்ற செயல்களும் கண்டிப்பாக தவிர்க்கப்பட வேண்டும். எவர் போற்றினாலும் எவர் தூற்றினாலும் எப்போதும் போல நம்முடைய பணியை தமிழ்நாட்டிற்கும், தமிழீழத்திற்கும், உலகத் தமிழர்களுக்கும் உறுதியாக களத்தில் நின்று மேற்கொள்வோமென்று இதன் மூலம் தெரிவித்துக் கொள்கிறேன்.
தொடர்ந்து தலைமையின் அறிவுறுத்தல்களை மீறி இது போன்ற கட்டுப்பாடற்ற செயல்களில் ஈடுபடும் பொறுப்பாளர்கள் மீது கடுமையான ஒழுங்கு நடவடிக்கை மேற்கொள்ளப்படும். இவ்வாறு வேல்முருகன் கூறியுள்ளார்.