தூத்துக்குடியில் ஸ்டெர்லைட்டுக்கு எதிராக நடந்த மக்கள் போராட்டத்தை வெளிநாட்டு சதி என தமிழக ஆளுநர் ஆர்.என். ரவி கூறியதற்கு திமுக எம்.பி. கனிமொழி கடும் கண்டனம் தெரிவித்துள்ளார்.
தமிழக ஆளுநராக பதவியேற்றது முதலாக திமுக அரசுடன் மோதல் போக்கை கடைப்பிடித்து வருகிறார் ஆர்.என். ரவி. மசோதாக்களுக்கு உடனடியாக அனுமதி வழங்காமல் இருப்பது என அலுவல் ரீதியாகவும், பொதுமேடைகளில் திமுக கடைப்பிடிக்கும் கொள்கைக்கு எதிராக பேசுவது என சித்தாந்த ரீதியாகவும் தமிழக அரசுடன் மோதல் போக்கில் ஈடுபட்டு வருகிறார். இதன் உச்சக்கட்டமாக, சட்டப்பேரவையிலும் முதல்வருக்கும், ஆளுநருக்கும் வெளிப்படையாக மோதல் வெடித்தது.
இந்த நிலையில்தான், தற்போது தூத்துக்குடி ஸ்டெர்லைட் தொழிற்சாலை குறித்து சர்ச்சைக்குரிய வகையில் பேசி இருக்கிறார் ஆளுநர். ஸ்டெர்லைட் தொழிற்சாலையால் தூத்துக்குடி மக்களுக்கு புற்றுநோய் பாதிப்பு, குடிநீர் மாசுபாடு போன்றவை ஏற்படுவதாக கூறி அத்தொழிற்சாலைக்கு எதிராக கடந்த 2018-ம் ஆண்டு அதிமுக ஆட்சிக்காலத்தில் பெரிய அளவில் மக்கள் போராட்டம் வெடித்தது. அப்போது யாருமே எதிர்பார்க்காத வகையில், போலீஸார் மக்கள் மீது துப்பாக்கிச் சூடு நடத்தினர். இதில் 13 பேர் கொல்லப்பட்டனர். தமிழகத்தில் பெரும் அதிர்வலைகளை ஏற்படுத்திய இந்தச் சம்பவம் தொடர்பாக விசாரணை நடத்த அருணா ஜெகதீசன் தலைமையில் ஆணையம் அமைக்கப்பட்டது. இந்த ஆணையத்தின் இறுதி அறிக்கை அண்மையில் சமர்ப்பிக்கப்பட்டது. அதில் முழுக்க முழுக்க துப்பாக்கிச் சூடு நடத்திய போலீஸார் மீதே குற்றச்சாட்டு வைக்கப்பட்டிருந்தது.
இதுபோன்ற சூழலில், இந்திய குடிமைப்பணி தேர்வுகளுக்கு தயாராகும் மாணவர்களுடன் ஆளுநர் ஆர்.என். ரவி இன்று கலந்துரையாடினார். அப்போது பேசிய அவர், “ஸ்டெர்லைட்டு ஆலைக்கு எதிராக மக்களை தூண்டிவிட்டு அதை சிலர் மூடியுள்ளனர். இந்தியாவின் காப்பர் தேவையில் 40 சதவீதத்தை ஸ்டெர்லைட் ஆலை உற்பத்தி செய்து வந்தது. வெளிநாடுகளில் இருந்து அனுப்பப்படும் நிதிகள், நம் நாட்டு வளர்ச்சிக்கு எதிராக பயன்படுத்தப்படுகின்றன” எனக் கூறினார். ஆளுநரின் இந்த பேச்சுக்கு தற்போது தமிழகம் முழுவதும் கண்டனங்கள் குவிந்து வருகின்றன. அரசியல் கட்சி தலைவர்கள், சமூக ஆர்வலர்கள் என பலரும் கண்டனம் தெரிவித்து வருகின்றனர்.
இந்நிலையில், திமுக மூத்த தலைவரும், தூத்துக்குடி எம்.பி.யுமான கனிமொழி தனது டுவிட்டர் பதிவில், “மக்கள் போராட்டத்தை கொச்சைப்படுத்தும் ஆளுநரை கண்டிக்கிறேன். வெளிநாட்டு சதி எனக் கூறுவதற்கான ஆதாரங்களை ஆளுநர் தர வேண்டும்” எனக் கூறியுள்ளார்.