காவிரி பிரச்னை தொடர்பாக தமிழக எம்.பி.கள் குழு மத்திய நீர்வளத் துறை அமைச்சரை சந்திக்கிறது.
காவிரி விவகாரம் தொடர்பாக தமிழகம் மற்றும் கர்நாடகா இடையே தொடர்ந்து பிரச்னை நீடித்து வருகிறது. காவிரி மேலாண்மை ஆணையத்தின் உத்தரவை மதிக்காத கர்நாடக அரசு, தமிழகத்திற்கு உரிய தண்ணீரை இதுவரை திறந்துவிடவில்லை. கடந்த செப்டம்பர் 12ஆம் தேதி நடந்த காவிரி ஒழுங்காற்று குழு கூட்டத்தில், அடுத்த 15 நாட்களுக்கு வினாடிக்கு 5,000 கன அடி தண்ணீர் திறந்துவிட வேண்டுமென கர்நாடகாவிற்கு பரிந்துரை செய்யப்பட்டுள்ளது. ஆனால், காவிரி ஒழுங்காற்று குழு கூட்டத்தின் உத்தரவை மதிக்காத கர்நாடகா, அனைத்து கட்சிக் கூட்டத்தை கூட்டி காவிரியில் தமிழகத்திற்கு தண்ணீர் திறந்துவிட முடியாது என அறிவித்தது. இதற்கு தமிழக விவசாயிகள் மத்தியில் கடும் எதிர்ப்பு எழுந்தது.
இதுதொடர்பாக முதலமைச்சர் மு.க.ஸ்டாலின் வெளியிட்ட அறிக்கையில், தமிழகத்திற்கு தண்ணீர் திறந்துவிடாத கர்நாடக அரசிற்கு கண்டனம் தெரிவித்தார். தமிழகத்திற்கு தண்ணீர் திறந்துவிடக் கோரி மத்திய ஜல்சக்தி துறை அமைச்சரிடம் தமிழ்நாட்டின் அனைத்து கட்சி நாடாளுமன்ற உறுப்பினர்களுடன் நீர்வளத் துறை அமைச்சர் துரைமுருகன் அளிக்கவுள்ளார் என்றும் தெரிவித்திருந்தார்.
இந்த நிலையில் காவிரி விவகாரம் தொடர்பாக டெல்லி செல்லும் தமிழ்நாடு எம்பிக்கள் குழு அறிவிக்கப்பட்டுள்ளது. திமுக சார்பில் டி.ஆர்.பாலு, காங்கிரஸ் சார்பில் ஜோதிமணி, அதிமுக சார்பில் தம்பிதுரை, சந்திரசேகரன் ஆகியோரும் அதில் இடம்பெற்றுள்ளனர். சிபிஐ சார்பில் சுப்பராயன், சிபிஎம் சார்பில் பி.ஆர்.நடராசன், மதிமுக சார்பில் வைகோ, விசிக சார்பில் திருமாவளவன், பாமக சார்பில் அன்புமணி ராமதாஸ், தமாக சார்பில் ஜி.கே.வாசன், முஸ்லீம் லீக் சார்பில் நவாஸ் கனி, கொமதேக சார்பில் சின்னராஜ் ஆகியோரும் இந்தக் குழுவில் இடம்பெற்றுள்ளனர்.