மக்களவையில் ஆ.ராசா பேச ஆரம்பித்த போது பாஜக எம்.பி.க்கள் அமளியில் ஈடுபட்டதால், அவருக்கு ஆதரவாக தயாநிதி மாறன் களத்தில் இறங்கினார். இதுதொடர்பாக வீடியோ சமூக வலைதளங்களில் பகிரப்பட்டு வருகிறது
நாடாளுமன்ற சிறப்புக் கூட்டத் தொடர் கடந்த 18ஆம் தேதி தொடங்கி நடைபெற்று வருகிறது. மக்களவையில் திமுக எம்.பி.க்கள் பேச எழும்போதெல்லாம் எதிர்வரிசையில் உள்ள ஆளும் பாஜக எம்.பி.க்கள் முழக்கங்கள் எழுப்பி அமளியில் ஈடுபட்டு வருகின்றனர். இந்த நிலையில் மக்களவையில் நேற்று சந்திரயான் வெற்றி உள்ளிட்ட விவகாரங்கள் குறித்து நாடாளுமன்ற உறுப்பினர்கள் பேசினர். திமுக தரப்பில் ஆ.ராசா பேச எழுந்து, “என்னை மக்களவையில் பேச அழைத்ததற்கு நன்றி” என்று கூறி உரையை ஆரம்பித்தார். அப்போது, எதிர்வரிசையில் அமர்ந்திருந்த பாஜக எம்.பி.க்கள் ராசாவுக்கு எதிராக முழக்கங்களை எழுப்பி அவரை பேச விடாமல் செய்தனர்.
அப்போது ஆ.ராசாவுக்கு பின் வரிசையில் அமர்ந்திருந்த தயாநிதி மாறன் எழுந்து பாஜக உறுப்பினர்களை நோக்கி, ‘உதை வாங்கப் போற நீ, டேய் உக்கார்டா, என்னா என்னா பேசுற ?” என்று தமிழிலேயே காட்டமானார். அப்போது, ஆ.ராசா தயாநிதி மாறனை நோக்கி என்ன சொல்றான் அவன் என தமிழில் கேட்டார். எனினும், பாஜக உறுப்பினர்கள் தொடர்ந்து அமளியில் ஈடுபட்டனர்.
அவையை வழிநடத்திக்கொண்டிருந்த மாற்றுத் தலைவர் ராஜேந்திர அகர்வால், பாஜக உறுப்பினர்களை நோக்கி அமைதியாக அமருங்கள் என்று கூறி ஆ.ராசாவை தொடர்ந்து பேச அறிவுறுத்தினார். ஆனாலும், தொடர்ந்து கோஷங்கள் கேட்டுக்கொண்டே இருந்தன. இதனால் தயாநிதி மாறன், “என்னய்யா.. என்னய்யா.. நீ மந்திரிதானே.. நீ மந்திரிதானே” என்று கேட்டார். இதனால் அவையில் சிறிது நேரம் சலசலப்பு எழுந்தது. இதுதொடர்பான் வீடியோ சமூக வலைதளங்களில் வைரலாகி வரும் நிலையில், தயாநிதி மாறன் பேச்சுக்கு பாஜகவினர் எதிர்ப்பு தெரிவித்து வருகின்றனர்.
அவை சற்று அமைதியான பிறகு பேசிய ஆ.ராசா, “தொண்டை சரியாக இல்லாததால் பேச வேண்டாம் என நினைத்திருந்தேன். ஆனால், இங்கே பேச வேண்டியது அவசியம் என்று நினைத்ததால் பேசுகிறேன். சந்திரயான் திட்டத்தில் தமிழர்களின் பங்கு அளப்பரியது. இஸ்ரோவில் சாதித்த தமிழர்களுக்கு இந்தியோ சமஸ்கிருதமோ தெரியாது, அவர்கள் அரசுப் பள்ளியில், அரசுக் கல்லூரியில் பயின்றவர்கள்” என்று தொடர்ந்து பேசினார்.