நிலவில் தூக்க நிலைக்கு கொண்டு செல்லப்பட்ட விக்ரம் லேண்டர் மற்றும் ரோவர் கருவியை எழுப்ப முயற்சித்து வருகிறோம். ஆனால் அவற்றில் இருந்து எந்த சிக்னலும் கிடைக்கவில்லை என்று இஸ்ரோ அதிர்ச்சி தகவலை வெளியிட்டிருக்கிறது.
சந்திரயான் 3 திட்டத்தின் கீழ் வெற்றிகரமாக நிலவில் தரையிறக்கப்பட்டு ஆய்வு மேற்கொண்டு வந்த விக்ரம் லேண்டர் மற்றும் பிரக்யான் ரோவர் கருவிகளில் இருந்து சிக்னல் வரவில்லை என இஸ்ரோ விஞ்ஞானிகள் தெரிவித்திருப்பது பரபரப்பை ஏற்படுத்தியுள்ளது. தூக்க நிலைக்கு அனுப்பி வைக்கப்பட்ட அந்தக் கருவிகளை விழிக்க வைக்க முடியாத நிலை ஏற்பட்டுள்ளது.
சந்திரயான் 3 திட்டத்தின் கீழ் இஸ்ரோ கடந்த மாதம் நிலவுக்கு ராக்கெட் அனுப்பியது. இதனைத் தொடர்ந்து, அதில் இருந்த விக்ரம் லேண்டரும், பிரக்யான் எனப் பெயரிடப்பட்ட ரோவர் கருவியும் பத்திரமாக நிலவின் தென் துருவத்தில் தரையிறக்கப்பட்டன. இதுவரை நிலவில் சீனா, அமெரிக்கா, ரஷ்யா போன்ற நாடுகள் தரையிறங்கி இருந்தாலும், உறைபனி வெப்பநிலை கொண்ட நிலவின் தென் துருவத்திற்கு இதுவரை எந்த நாடாலும் செல்ல முடியவில்லை. எனவே இது இந்தியாவின் மகத்தான சாதனையாக உலக நாடுகளால் பார்க்கப்பட்டது.
நிலவின் தென் துருவத்தில் தரையிறங்கிய விக்ரம் லேண்டரில் இருந்து வெளிவந்த பிரக்யான் ரோவர் கருவி அங்கு ஆய்வுப் பணியில் ஈடுபட்டது. அப்போது நிலவின் தென் துருவத்தில் சல்பர், ஆக்சிஜன் வாயு, கால்சியம் ஆகியவை இருப்பதை கண்டுபிடித்து பூமிக்கு தகவல் அனுப்பியது. ரோவரின் இந்த ஆராய்ச்சி முடிவுகள், நிலவு தொடர்பான ஆராய்ச்சியில் பெரும் மைல் கல்லாக கருதப்பட்டது.
இவ்வாறு நிலவில் இரண்டு நாட்கள் (பூமியில் 14 நாட்கள்) ரோவர் ஆய்வு செய்த சூழலில், அங்கு இரவு வர தொடங்கியது. சூரிய சக்தியில் இவை செயல்படுவதால் விக்ரம் லேண்டரையும், ரோவரையும் இஸ்ரோ விஞ்ஞானிகள் ஸ்லீப்பிங் மோடுக்கு (Sleeping Mode) கொண்டு சென்றனர். இந்நிலையில், நேற்று நிலவில் இரவு முடிந்து பகல் வந்தது. சூரிய வெளிச்சம் வந்ததால் விக்ரம் லேண்டரையும், ரோவர் கருவியையும் இஸ்ரோ விஞ்ஞானிகள் எழுப்பினர். ஆனால், தூக்கத்தில் இருந்து அவை விழித்துக் கொள்ளவில்லை.
இதுகுறித்து இஸ்ரோ வெளியிட்ட அறிக்கையில், “தரைக் கட்டுப்பாட்டு மையத்தில் இருந்து ரோவரையும், விக்ரம் லேண்டரையும் எழுப்ப தொடர்ந்து முயற்சிகள் நடந்து கொண்டிருக்கின்றன. ஆனால், அந்தக் கருவிகளில் இருந்து இதுவரை சிக்னல் கிடைக்கவில்லை. தொடர்ந்து முயற்சி செய்து கொண்டிருக்கிறோம்” எனத் தெரிவிக்கப்பட்டுள்ளது.