இந்தியா எப்போதும் எங்களின் பரம எதிரி என பாகிஸ்தான் ராணுவ தலைமை தளபதி பேசியிருப்பது பெரும் சர்ச்சையையும் பரபரப்பையும் ஏற்படுத்தியுள்ளது.
கைபர் பக்துன்க்வாவின் ரிசல்பூரில் உள்ள அஸ்கர் கான் அகாடமியில் பாகிஸ்தான் விமானப்படையின் பாஸிங் அவுட் அணிவகுப்பு நேற்று நடைபெற்றது. இதில் கலந்து கொண்டு அந்நாட்டு ராணுவ தலைமை தளபதி அசீம் முனீர் சிறப்பு உரையாற்றினார். அப்போது இந்தியாவை தாக்கி பேசிய அசீம் முனிர், காஷ்மீர் மற்றும் 2019 ஆம் ஆண்டு இந்தியா பாகிஸ்தான் இடையே நிலவிய சூழல் குறித்தும் குறிப்பிட்டு பேசினார்.
அதாவது தார்மீக ரீதியாகவும் அரசியல் ரீதியாகவும் மற்றும் ராஜதந்திர ரீதியாகவும் காஷ்மீர் மக்களுக்கு பாகிஸ்தான் தொடர்ந்து ஆதரவு அளிக்கும் என்று கூறியுள்ளார். மேலும் இந்தியா தான் தங்களுடைய பரம எதிரி என்றும் ஆவேசமாக கூறியுள்ளார் அசீம் முனீர். அதுமட்டுமின்றி அந்நாட்டு நீதித்துறையையும் சாடியுள்ளார்.
பாகிஸ்தான் நீதித்துறையில் அந்நாட்டின் புலனாய்வு அமைப்பு மற்றும் ராணுவத்தின் தலையீடு உள்ளதாக இஸ்லாமாபாத் உயர்நீதிமன்றத்தின் 6 நீதிபதிகள் கடந்த மார்ச் 25 ஆம் தேதி உச்சநீதிமன்றத்திற்கு கடிதம் எழுதினர். இதுதொடர்பாக உச்சநீதிமன்ற நீதிபதி கடந்த 2 நாட்களுக்கு முன்பு கருத்து தெரிவித்திருந்தார்.
ஒரு குறிப்பிட்ட நடவடிக்கையை எடுக்க நீதித்துறையை தள்ளுவது நீதித்துறை செயல்பாட்டில் தலையிடுவதற்கு ஒப்பானது என்று பாகிஸ்தானின் தலைமை நீதிபதி காசி ஃபேஸ் இசா கூறியிருந்தார். இந்த விவகாரம் அந்நாட்டில் பேசு பொருளாகியுள்ள நிலையில் அதற்கும் பதில் அளித்த அசீம் முனிர், எங்கள் அரசியல் அமைப்புகளை நாங்கள் நன்கு அறிவோம். மற்றவர்கள் அரசியல் அமைப்பை நிலை நிறுத்துவார்கள் என்று நாங்கள் எதிர்பார்க்கிறோம் என்றார்.
மேலும் பாகிஸ்தான் இஸ்லாமிய குடியரசின் அரசியலமைப்பின் 19 ஆவது பிரிவு பேச்சு சுதந்திரம் மற்றும் கருத்தை வெளிப்படுத்தும் சுதந்திரத்தின் வரம்புகளை தெளிவாக வரையறுக்கிறது என்றும் அவர் தலைமை நீதிபதிக்கு பதில் அளித்தார். தொடர்ந்து பேசிய ராணுவ தலைமை தளபதி அசீம் முனீர், 2019 ஆம் ஆண்டு பிப்ரவரியில் இந்திய போர் விமானத்தை பாகிஸ்தான் ராணுவம் சுட்டு வீழ்த்தியதை பாராட்டினார்.
அனைத்து வகையான சிரமங்களிலும் வான்வெளியில் ரோந்து சென்றதற்காகவும், நீங்கள் எங்கள் நம்பிக்கையின் மையம் வானத்தின் பாதுகாவலர் மற்றும் பிராந்திய ஒற்றுமைக்கு உத்தரவாதம் அளிப்பவர்கள் என்றும் ராணுவ தலைமை தளபதி அசீம் முனிர், பாஸிங் அவுட் ராணுவ அதிகாரிகள் முன்னிலையில் புகழாரம் சூட்டினார்.
தற்போது இந்தியாவில் நாடாளுமன்ற மக்களவைத் தேர்தல் நடைபெற்று வருகிறது. இந்நிலையில் பாகிஸ்தான் ராணுவ தலைமை தளபதி இந்தியா தங்களின் பரம எதிரி என கூறியிருப்பது பெரும் சர்ச்சை ஏற்படுத்தி உள்ளது. இரு நாடுகளுக்கு இடையிலான உறவில் அமைதி ஏற்படுமா என எதிர்பார்க்கப்பட்டு வரும் நிலையில் பாகிஸ்தான் ராணுவ தலைமை தளபதியின் இந்த பேச்சு பெரும் பரபரப்பை ஏற்படுத்தியுள்ளது.