தமிழ்நாடு அரசை அவதூறாகப் பேசிய வழக்கில் அதிமுக முன்னாள் அமைச்சர் சி.வி.சண்முகம், விழுப்புரம் நீதிமன்றத்தில் ஆஜராக உத்தரவிடப்பட்டுள்ளது.
கடந்த மார்ச் 7ஆம் தேதி விழுப்புரம் மாவட்டம் செஞ்சி அடுத்த நாட்டார்மங்கலத்தில் அதிமுக பொதுக்கூட்டம் நடைபெற்றது. அந்த நிகழ்ச்சியில் கலந்துகொண்டு பேசிய அதிமுக மாநிலங்களவை உறுப்பினரும், முன்னாள் அமைச்சருமான சி.வி.சண்முகம் தமிழக அரசையும், முதல்வர் மு.க.ஸ்டாலினையும் தரக்குறைவாக பேசினார். தமிழக அரசையும், முதலமைச்சரையும் அவரது மதிப்பையும், மாண்பையும் குறைக்கும் வகையில் தரக்குறைவாகவும், அவதூறாகவும் பேசியதால் அவர் மீது நடவடிக்கை எடுக்க வேண்டும் என்று அரசு வழக்கறிஞர்கள் சார்பில் விழுப்புரம் மாவட்ட முதன்மை அமர்வு நீதிமன்றத்தில் வழக்கு தொடரப்பட்டது.
இந்த வழக்கை விசாரித்த விழுப்புரம் மாவட்ட முதன்மை அமர்வு நீதிபதி பூர்ணிமா, வழக்கு விசாரணை அக்டோபர் 9 ஆம் தேதி நடைபெறும் என்று தெரிவித்தார். மேலும் அன்றைய தினம் சி.வி.சண்முகம் நீதிமன்றத்தில் நேரில் ஆஜராக வேண்டும் என்றும் உத்தரவிட்டுள்ளார்.
இந்நிலையில் நேற்று விழுப்புரம் அதிமுக அலுவலகத்தில் மாற்றுக் கட்சிகளைச் சேர்ந்த சுமார் 50 பேர் சி.வி.சண்முகம் முன்னிலையில் கட்சியில் இணைந்தனர். பின்னர் செய்தியாளர்களை சந்தித்த சிவி சண்முகம், “சனாதன தர்மத்தை எதிர்க்கிறோம் என்ற பெயரிலேயே இன்றைக்கு சொல்லிக் கொண்டிருக்கின்ற உதயநிதி அவர் எப்படி இந்த பதவிக்கு வந்தார்? சனாதன தர்மத்தில் சொல்லப்படுகின்ற அதனை எதிர்க்கின்ற ஒரு விஷயம் குலத்தொழில். இன்று திமுகவை குலத் தொழிலாக தாத்தா, அப்பா, மகன் வழியிலே குலத்தொழிலாக நடத்தி பதவிக்கு வந்த உதயநிதி ஸ்டாலினுக்கு இதைப் பற்றி பேச எந்த அருகதையும் தகுதியும் கிடையாது. திமுகவே ஒரு டெங்கு தான் திமுக ஒழிந்தால் தான் தமிழ்நாட்டில் டெங்கு ஒழியும்” என பேசினார்.