மணிப்பூர் பதற்றம் நிறைந்த மாநிலமாக அறிவிக்கப்பட்டுள்ளது. 19 காவல்நிலைய எல்லைகளுக்கு உட்பட்ட பகுதிகளை தவிர மாநிலத்தின் மற்ற அனைத்து பகுதிகளையும் பதற்றமானவையாக அறிவித்து அம்மாநில உள்துறை அமைச்சகம் உத்தரவிட்டுள்ளது.
மணிப்பூர் மாநிலத்தில் கடந்த சில மாதங்களாக வன்முறை நிலவி வருகிறது. மேய்தி மற்றும் குக்கி சமூக மக்களிடையே கடந்த மே மாதம் ஏற்பட்ட மோதல் பெரும் வன்முறையாக வெடித்தது. தொடர்ந்து நடைபெற்று வரும் இந்த வன்முறையில் இதுவரை 100க்கும் மேற்பட்டோர் உயிரிழந்தனர். ஏராளமான வீடுகள், வாகனங்கள், கடைகள், தேவாலயங்கள், கோவில்கள் மற்றும் பொதுமக்கள் கூடும் இடங்கள் உள்ளிட்டவை தீக்கு இரையாக்கப்பட்டுள்ளன. ஆயிரக்கணக்கான மக்கள் முகாம்களில் தங்க வைக்கப்பட்டுள்ளனர். ஆயுதமேந்திய பாதுகாப்பு படையினர் குவிக்கப்பட்டுள்ள போதும் அங்கு கலவரங்கள் குறைந்தபாடில்லை.
தொடரும் வன்முறையால் அங்கு இன்னும் இயல்பு நிலை திரும்பவில்லை. மணிப்பூர் கலவரம் தொடர்பாக சிபிஐ விசாரணை நடத்தி வருகிறது.
இந்நிலையில் கடந்த ஜூலை மாதம் கடத்தப்பட்ட மேதி இனத்தை சேர்ந்த 20 வயது கல்லூரி மாணவரும் அவரது 17 வயது தோழியும் காட்டில் சடலமாக கிடக்கும் புகைப்படங்கள் மற்றும் ஆயுதமேந்திய கும்பலிடம் அவர்கள் சிக்கியிருக்கும் புகைப்படங்களும் வெளியாகி பெரும் அதிர்ச்சியை ஏற்படுத்தியுள்ளது. மாணவன் மற்றும் மாணவி கொல்லப்பட்டதைக் கண்டித்து நேற்று பள்ளி கல்லூரி மாணவ மாணவிகள் போராட்டத்தில் ஈடுபட்டனர். முதல்வர் அலுவலகத்தை நோக்கி பேரணியாக சென்ற அவர்களை காவல்துறையினர் தடுத்து நிறுத்த முயன்றதால் மோதல் வெடித்தது. இதையடுத்து கண்ணீர் புகைக் குண்டுகளை வீசியும் தடியடி நடத்தியும் போராட்டத்தில் ஈடுபட்டவர்களை போலீசார் விரட்டியடித்தனர். இதனால் அங்கு மீண்டும் பதற்றம் நிலவி வருகிறது.
இன்றும் இம்பாலின் சில பகுதிகளில் மாணவ மாணவிகள் போராட்டத்தில் ஈடுபட்டனர். இதனை தொடர்ந்து மணிப்பூர் மாநிலத்தை பதற்றம் நிறைந்த மாநிலமாக அம்மாநில உள்துறை அமைச்சகம் அறிவித்துள்ளது. மணிப்பூர் மாநிலத்தின் 19 காவல் நிலைய பகுதிகளை தவிர மாநிலத்தின் அனைத்துப் பகுதிகளையும் பதற்றமான பகுதிகளாக அறிவிக்கப்பட்டுள்ளது. அக்டோபர் 1ஆம் தேதி முதல் 6 மாதங்களுக்கு இந்த அறிவிப்பு அமலில் இருக்கும் என்றும் தெரிவிக்கப்பட்டுள்ளது. மேலும் ஆயுதம் ஏந்திய காவலர்களும் பாதுகாப்பு பணியில் குவிக்கப்பட்டுள்ளனர். தொடர்ந்து பதற்றமான சூழல் மற்றும் பெரும் அளவு வன்முறை வெடிக்காமல் தடுக்கும் வகையில் மணிப்பூர் மாநில அரசு இந்த நடவடிக்கையை மேற்கொண்டுள்ளது.