எம்.ஜி.ஆர் குறித்த திமுக எம்.பி ஆ.ராசாவின் பேச்சுக்கு டிடிவி தினகரன் எச்சரிக்கை விடுத்துள்ளார்.
திமுக துணை பொதுச் செயலாளரும், நீலகிரி தொகுதி மக்களவை உறுப்பினருமான ஆ.ராசா அதிமுக நிறுவனரும் முன்னாள் முதலமைச்சருமான எம்.ஜி.ஆர் குறித்து பேசிய காணொலி சமூக வலைதளங்களில் பரவியது. அதில், எம்ஜிஆரை தான் மதிக்கமாட்டேன் என்றும், மேலும் அவரை விமர்சித்தும் சில கருத்துகளைத் தெரிவித்தார். இதற்கு அதிமுகவினர் மத்தியில் கடும் எதிர்ப்பு எழுந்த நிலையில் ஆ.ராசா பேச்சுக்கு எடப்பாடி பழனிசாமி கண்டனம் தெரிவித்து இருந்தார். மறைந்த தலைவர்கள் குறித்து அவதூறாக பேசி ஆதாயம் தேடிக்கொள்ள நினைப்பது தான் சுயநலவாதி ஆ.ராசாவின் வாடிக்கை என்றும், வருகின்ற நாடாளுமன்ற தேர்தலில் ராசாவிற்கு மக்கள் தகுந்த பதிலடி கொடுப்பார்கள் என்றும் குறிப்பிட்டு இருந்தார்.
இந்த நிலையில் அமமுக பொதுச் செயலாளர் டிடிவி தினகரன் வெளியிட்ட அறிக்கையில், மண்ணை விட்டு மறைந்தாலும், மக்கள் மனதில் இன்றளவும் வாழ்ந்து கொண்டிருக்கும் எம்ஜிஆர் பற்றிய திமுக துணைப் பொது செயலாளர் ஆ.ராசாவின் நாகரீகமற்ற பேச்சு கண்டனத்திற்குரியது என்று தெரிவித்துள்ளார்.
திமுகவை தீயசக்தி எனக்கூறி தான் உயிரோடு இருக்கும் வரை ஆட்சிப் பொறுப்பிற்கு வரவிடாமல் அடியோடு சாய்த்த மறைந்த பின்பும் திமுகவிற்கு சிம்ம சொப்பனமாக திகழ்கிறார் எம்ஜிஆர் என்பதையே ஆ.ராசாவின் தரம் தாழ்ந்த பேச்சு வெளிப்படுத்துவதாகவும் அவர் கூறினார்.
தனது இறுதி மூச்சு வரை மக்களுக்காகவே வாழ்ந்து பொதுவாழ்வில் நேர்மையின் அடையாளமாக திகழ்ந்த எம்.ஜி.ஆர், ஜெயலலிதா பற்றியும் விமர்சனம் செய்ய திமுகவினருக்கு என்ன தகுதி இருக்கிறது என்று கேள்வி எழுப்பிய டிடிவி தினகரன், “ஒரு குடும்பத்தின் கட்டுப்பாட்டில் கட்சியும், ஆட்சியும் இன்று சிக்கித் தவித்துக் கொண்டிருக்கும் நிலையில், அரை நூற்றாண்டுக்கும் முன்பாகவே அரசியலில் கடைக்கோடி தொண்டனும் உயர்ந்த பதவிக்கு வரமுடியும் என்பதை நிரூபித்துக் காட்டியவர் எம்.ஜி.ஆர் என்பதை திமுகவினர் மறந்துவிடக்கூடாது” என்றும் கூறியுள்ளார்.
அரசியல் காரணத்திற்காக இழிவுப்படுத்தும் நோக்கிலான பேச்சுக்கள், எம்ஜிஆர் பெயருக்கும், புகழுக்கும் எந்தவகையிலும் களங்கத்தை ஏற்படுத்தாது என்பதை திமுகவினர் உணர வேண்டும் என்றும், மறைந்த தலைவர்கள் மீது தொடர்ந்து சர்ச்சைக்குரிய விமர்சனங்களை வைத்து வரும் ஆ.ராசா அவர்கள் இனியாவது தனது தகுதியை அறிந்து பேச வேண்டும், இல்லையெனில் அதற்கான பாடத்தை வரும் தேர்தல்களில் மக்கள் புகட்டுவார்கள் என்றும் டிடிவி தினகரன் எச்சரிக்கை விடுத்துள்ளார்.