முதல்முறையாக சீன பாதுகாப்பு அமைச்சர் ரஷ்யாவிற்கு பயணம் மேற்கொண்டுள்ளார்.
உலக நாடுகள் தன் சொல்படி தான் நடக்க வேண்டும், தன்னை மீறி எதுவும் செய்து விட கூடாது என எப்போதுமே அமெரிக்கா, உலகின் ஏகாதிபத்திய சக்தியாக இருந்து வருகிறது. தன்னை எதிர்க்கும் நாடுகளின் அண்டை நாடுகளை உசுப்பி விட்டு போர்களில் ஈடுபட வைப்பது, உள்நாட்டு தீவிரவாதிகளுக்கு நிதி மற்றும் ஆயுத உதவி வழங்குவது, சிஐஏ எனும் தனது உளவுத்துறையை வைத்து நாட்டின் பிரதமர்களை மாற்றுவது, வளரும் நாடுகளை சுரண்டுவது என அமெரிக்கா செய்து வரும் அட்டூழியங்கள் அபாயகரமானவை. அமைதியாக இருந்த ஈராக்கில் போர், ஆப்கானிஸ்தான் போர், வியட்நாம் போர், உக்ரைன் போர், தான் சொன்னதை கேட்காத பாகிஸ்தான் பிரதமராக இருந்த இம்ரான் கானை மாற்றியது, இந்தியாவின் வளங்களை சூறையாடியது, ஐஎஸ்ஐஎஸ் தீவிரவாத குழுக்களை உருவாக்கியது என பல்வேறு குற்றச்சாட்டுக்கள் அமெரிக்கா மீது சுமத்தப்பட்டுள்ளன.
அமெரிக்காவின் வல்லாதிக்கத்தை முடிவு கட்டும் வகையில், உலகின் நம்பர் 1 பொருளாதார நாடான சீனா கங்கணம் கட்டிக் கொண்டு வேலை செய்து வருகிறது. வலிமை மிக்க தலைவராக ஜி ஜின்பிங் சீன அதிபராக மூன்றாம் முறை தேர்வு செய்யப்பட்ட பின், அமெரிக்காவின் வல்லாதிக்கத்தை ஒழிப்பதே தனது பணி என கொண்டு செயல்பட்டு வருகிறது. இந்த சூழலில் முதல் முறையாக சீன பாதுகாப்பு அமைச்சர் ரஷ்யாவிற்கு பயணம் செய்தது, அமெரிக்காவிற்கு பெருத்த அடியாக கருதப்படுகிறது. நேற்று ரஷ்ய அதிபர் விளாடிமிர் புடினுடனான சந்திப்பின் போது சீன பாதுகாப்பு அமைச்சர் லீ ஷாங்ஃபு ரஷ்யாவுடனான உறவுகளைப் பாராட்டினார். “எங்களிடம் மிகவும் வலுவான உறவுகள் உள்ளன. அவை பனிப்போர் காலத்தின் இராணுவ-அரசியல் கூட்டணிகளை மிஞ்சும். அவை மிகவும் நிலையானவை” என்று ரஷ்ய தொலைக்காட்சியில் ஒளிபரப்பப்பட்ட மொழிபெயர்ப்பில் அவர் கூறினார்.
ரஷ்யா – சீனா உறவுகள் “ஏற்கனவே ஒரு புதிய சகாப்தத்தில் நுழைந்துள்ளன” என்று அவர் கூறினார். “சீனாவின் பாதுகாப்பு அமைச்சராகப் பொறுப்பேற்ற பிறகு இது எனது முதல் வெளிநாட்டுப் பயணம். நமது இருதரப்பு உறவுகளின் சிறப்புத் தன்மை மற்றும் மூலோபாய முக்கியத்துவத்தை வலியுறுத்துவதற்காக நான் குறிப்பாக ரஷ்யாவைத் தேர்ந்தெடுத்தேன்” என்று லி கூறினார்.
ரஷ்யாவின் பாதுகாப்பு அமைச்சர் செர்ஜி ஷோய்குவும் கலந்துகொண்ட கூட்டத்தில், ரஷ்யாவிற்கும் சீனாவிற்கும் இடையிலான இராணுவ ஒத்துழைப்பை புடின் வரவேற்றார். “நாங்கள் இராணுவத் துறைகள் மூலமாகவும் தீவிரமாகச் செயல்படுகிறோம், பயனுள்ள தகவல்களைத் தவறாமல் பரிமாறிக்கொள்கிறோம், இராணுவ-தொழில்நுட்ப ஒத்துழைப்புத் துறையில் ஒத்துழைக்கிறோம், கூட்டுப் பயிற்சிகளை நடத்துகிறோம்” என்று ரஷ்ய அதிபர் புடின் கூறினார்.
“இது, சந்தேகத்திற்கு இடமின்றி, நமது உறவுகளின் பிரத்தியேக நம்பிக்கையான, மூலோபாயத் தன்மையை வலுப்படுத்தும் மற்றொரு முக்கியமான பகுதி” என்று அவர் மேலும் கூறினார். கடந்த மாதம் சீனாவின் தலைவர் ஜி ஜின்பிங்கின் ரஷ்யாவிற்கு உத்தியோகபூர்வ விஜயம் செய்த சில வாரங்களுக்குப் பிறகு, பாதுகாப்பு அமைச்சர் லியின் ரஷ்யா பயணம் அமைந்துள்ளது.
ரஷ்யாவும் சீனாவும் கடந்த ஆண்டுகளில் ஒத்துழைப்பை அதிகப்படுத்தியுள்ளன, இவை இரண்டும் அமெரிக்க உலகளாவிய மேலாதிக்கத்தை சமநிலைப்படுத்தும் விருப்பத்தால் இயக்கப்படுகின்றன. கடந்த பிப்ரவரி மாதம் உக்ரைனில் புடின் தாக்குதலைத் தொடங்கியதில் இருந்து அவர்களது கூட்டாண்மை நெருக்கமாக வளர்ந்துள்ளது.