கிருஷ்ணகிரியில் ராணுவ வீரர் கொல்லப்பட்டதை கண்டித்து தமிழக பாஜக தலைவர் அண்ணாமலை போராட்டம் அறிவிப்பு
கிருஷ்ணகிரி மாவட்டம் போச்சம்பள்ளி தாலுகா வேலம்பட்டி எம்.ஜி.ஆர். நகரை சேர்ந்தவர் பிரபாகரன் (வயது 31). இதே ஊரை சேர்ந்தவர் சின்னசாமி (55). இவர் நாகோஜஅள்ளி பேரூராட்சி தி.மு.க. கவுன்சிலராக இருந்து வருகிறார். பிரபாகரனும், அவரது சகோதரர் பிரபு (28) என்பவரும் ராணுவத்தில் பணிபுரிந்து வந்தனர். இவர்கள் விடுமுறையில் ஊருக்கு வந்து இருந்தனர். இந்த நிலையில் கடந்த 8-ந் தேதி பொது குடிநீர் தொட்டி அருகில் பிரபாகரன் துணி துவைத்தது குறித்து அங்கு வந்த கவுன்சிலர் சின்னசாமி கேட்டுள்ளார். பின்னர் அன்று மாலை சின்னசாமி மற்றும் அவரது மகன்கள் குருசூர்யமூர்த்தி (27), குணாநிதி (19), ராஜபாண்டியன் (30) ஆகியோர் பிரபாகரன் வீட்டுக்கு சென்று அவரிடம் வாக்குவாதத்தில் ஈடுபட்டனர். அப்போது இருதரப்பினருக்கும் இடையே மோதல் ஏற்பட்டு ஒருவரை ஒருவர் தாக்கி கொண்டனர். இதில் ஆத்திரம் அடைந்த சின்னசாமி தரப்பினர் பிரபாகரன், அவரது தம்பி பிரபு, தந்தை மாதையன் ஆகிய 3 பேரையும் சரமாரியாக தாக்கினர். இதில் அவர்கள் படுகாயம் அடைந்தனர். அவர்களை அருகில் இருந்தவர்கள் மீட்டு ஓசூரில் உள்ள தனியார் மருத்துவமனையில் சேர்த்தனர்.
இது குறித்து பிரபாகரன் கொடுத்த புகாரின் பேரில் போலீசார், கவுன்சிலர் சின்னசாமி, அவரது மகன்கள் குருசூர்யமூர்த்தி, குணாநிதி, ராஜபாண்டியன் (30), மற்றும் மணிகண்டன் (32), மாதையன் (60), புலிபாண்டி (24), வேடியப்பன் (55), காளியப்பன் (40) ஆகிய 9 பேர் மீது வழக்குப்பதிவு செய்தனர். அவர்களில் குருசூர்யமூர்த்தி, குணாநிதி, ராஜபாண்டியன், மணிகண்டன், மாதையன், வேடியப்பன் ஆகிய 6 பேர் கைது செய்யப்பட்டனர். இவர்களில் குருசூர்யமூர்த்தி சென்னை மாநகரில் ஆயுதப்படை போலீசாக பணியாற்றி வருகிறார். குணாநிதி கல்லூரி மாணவர் ஆவார்.
இதனிடையே படுகாயம் அடைந்து மருத்துவமனையில் சிகிச்சை பெற்று வந்த ராணுவ வீரர் பிரபு நேற்று முன்தினம் மாலை பரிதாபமாக இறந்தார். இதையடுத்து இந்த வழக்கை கொலை வழக்காக போலீசார் மாற்றி விசாரணை நடத்தி வருகின்றனர். மேலும் தலைமறைவாக இருந்த கவுன்சிலர் சின்னசாமி, காளியப்பன், புலிபாண்டி, ஆகிய 3 பேரையும் போலீசார் நேற்று கைது செய்தனர். இரு தரப்பு மோதலில் ராணுவ வீரர் கொலை செய்யப்பட்ட சம்பவம் மாநில அளவில் பெரும் பரபரப்பை ஏற்படுத்தியுள்ளது. மேலும், இந்த கொலை சம்பவத்தில் திமுக கவுன்சிலருக்கு நேரடி தொடர்பு இருப்பது மேலும் அதிர்ச்சியை ஏற்படுத்தியது.
இந்நிலையில், இச்சம்பவத்துக்கு கண்டனம் தெரிவித்துள்ள தமிழக பாஜக தலைவர் அண்ணாமலை முன்னாள் ராணுவ வீரர்கள் தலைமையில் போராட்டம் அறிவித்துள்ளார். அதுகுறித்து அவர் டுவிட்டர் பதிவில், திமுக கவுன்சிலரால் அடித்துக் கொலை செய்யப்பட்ட ராணுவ வீரர் பிரபுவுக்கு மரியாதை செலுத்தும் வகையில், தமிழக பாஜகவில் உள்ள முன்னாள் ராணுவ வீரர் பிரிவினர், ராணுவ பேட்ஜ் மற்றும் தொப்பி அணிந்து, நமது ராணுவத்திற்கு இழைக்கப்பட்ட அவமரியாதைக்குக் காரணமான திமுக அரசைக்கண்டித்துப் போராட்டம் நடத்துவார்கள்.
முன்னாள் ராணுவ வீரர் பிரிவைச் சேர்ந்தவர்கள், அந்தந்த மாவட்ட ஆட்சியர் அலுவலகத்தின் முன், நாளை போராட்டம் நடத்துவார்கள். தமிழக பாஜக சார்பில், முன்னாள் ராணுவ வீரர் பிரிவின் தலைவர் Lt. Col ராமன், பிரபுவுக்கு அஞ்சலி செலுத்துகிறார். ராணுவ வீரர்களுக்குக் கூட பாதுகாப்பில்லாத மோசமான திமுக கட்சியின் ஆட்சிக்கு எதிராக, அடுத்த சில நாட்களில் போர் நினைவிடத்தில் நடத்தப்பட உள்ள போராட்டத்தில் இணைய, அனைத்து முன்னாள் ராணுவ வீரர்களையும் அழைக்கிறேன்” என்று அதில் தெரிவிக்கப்பட்டுள்ளது.