மக்களவைத் தேர்தலில் பாரதிய ஜனதா கட்சியை தோற்கடிக்கும் இலக்கை கட்சியின் தலைவர் மல்லிகார்ஜுன் கார்கே தலைமையில் அடைய வேண்டும். காங்கிரஸ் கட்சியின் தலைவராக தனது இன்னிங்ஸ் “பாரத் ஜோடோ யாத்ரா” மூலம் நிறைவடைந்ததில் மகிழ்ச்சி அடைகிறேன் என்று காங்கிரஸ் முன்னாள் தலைவரான சோனியா காந்தி கூறியுள்ளார்.
சத்தீஷ்கர் மாநிலம் ராய்ப்பூரில் காங்கிரஸ் கட்சியின் 3 நாள் மாநாடு நேற்று தொடங்கியது. இந்த மாநாட்டில் வரும் பாராளுமன்ற தேர்தல், கூட்டணி உள்பட பல்வேறு விவகாரங்கள் குறித்து ஆலோசிக்கப்பட்டு வருகிறது. காங்கிரஸ் தலைவர் மல்லிகர்ஜூன கார்கே தலைமையில் நடைபெறும் இந்த கூட்டத்தில் காங்கிரஸ் முன்னாள் தலைவரான சோனியா காந்தி, ராகுல்காந்தி, மூத்த தலைவர்கள், பிரியங்கா காந்தி, கட்சி நிர்வாகிகள் உள்பட பலர் பங்கேற்றுள்ளனர். இந்நிலையில், கூட்டத்தில் காங்கிரஸ் முன்னாள் தலைவர் சோனியா காந்தி பேசியதாவது:-
தொழிலதிபர் கௌதம் அதானியின் வணிக சாம்ராஜ்யம் தொடர்பான சர்ச்சையில் தொழிலதிபருக்கு ஆதரவாக பாஜக அரசு பொருளாதார அழிவை ஏற்படுத்தியுள்ளது. காங்கிரஸ் ஒரு அரசியல் கட்சி மட்டுமல்ல, அது அனைத்து மதங்கள், சாதிகள் மற்றும் மக்களின் குரலைப் பிரதிபலிக்கிறது. அவர்கள் அனைவரின் கனவுகளையும் காங்கிரஸ் கட்சி நிறைவேற்றும். காங்கிரஸுக்கும் நாட்டிற்கும் இது மிகவும் சவாலான நேரம். பிரதமர் நரேந்திர மோடியும், பாஜகவும் ஒவ்வொரு நிறுவனத்தையும் கைப்பற்றியுள்ளனர்.
சிறுபான்மையினர், பெண்கள், தலித்துகள் மற்றும் பழங்குடியினரை பாஜக கடுமையாக குறிவைத்து வெறுப்பு நெருப்பை தூண்டுகிறது. அரசாங்கத்தின் நடவடிக்கைகள் அரசியலமைப்பில் பொதிந்துள்ள மதிப்புகளை அவமதிப்பதைக் காட்டுகிறது. 2024 மக்களவைத் தேர்தலில் பாரதிய ஜனதா கட்சியை தோற்கடிக்கும் இலக்கை கட்சியின் தலைவர் மல்லிகார்ஜுன் கார்கே தலைமையில் அடைய வேண்டும் என்று காங்கிரஸ் தொண்டர்களை வலியுறுத்துகிறேன். பாஜக ஆட்சியை நாம் வீரியத்துடன் எதிர்கொள்ள வேண்டும். மக்களிடம் நமது செய்தியை தெளிவுடன் தெரிவிக்க வேண்டும். நம் தனிப்பட்ட லட்சியங்களை ஒதுக்கி வைக்க நாம் தயாராக இருக்க வேண்டும். இன்றைய சூழ்நிலை நான் முதன்முதலில் பாராளுமன்றத்தில் நுழைந்த காலத்தை நினைவூட்டுகிறது.
காங்கிரஸ் கட்சியின் தலைவராக எனது இன்னிங்ஸ் “பாரத் ஜோடோ யாத்ரா” மூலம் நிறைவடைந்ததில் மகிழ்ச்சி அடைகிறேன். யாத்திரைக்காக கடுமையாக உழைத்த அனைத்து கட்சித் தொண்டர்களுக்கும் எனது வாழ்த்துகளைத் தெரிவித்துக் கொள்கிறேன். யாத்திரையின் வெற்றியில் உறுதியும் தலைமையும் காரணமாக இருந்த ராகுல்ஜிக்கு எனது நன்றியைத் தெரிவித்துக் கொள்கிறேன். இவ்வாறு அவர் கூறினார்.