ஆந்திர முன்னாள் முதல்வர் சந்திரபாபு நாயுடுவை காவலில் எடுத்து விசாரிக்க அம்மாநில சிறப்பு நீதிமன்றம் உத்தரவிட்டுள்ளது.
ஆந்திர மாநில முன்னாள் முதல்வரும் தெலுங்கு தேசம் கட்சியின் தலைவருமான சந்திரபாபு நாயுடு திறன் மேம்பாட்டு நிதியில் 300 கோடி ரூபாய் ஊழல் செய்ததாக கைது செய்யப்பட்டு சிறையில் அடைக்கப்பட்டுள்ளார். சந்திரபாபு நாயுடுவின் கைதை கண்டித்து தெலுங்கு தேசம் கட்சியினர் போராட்டங்களில் ஈடுபட்டு வருகின்றனர். நேற்று முன்தினம் தொடங்கிய ஆந்திர சட்டசபையின் மழைக்கால கூட்டத்தொடரின் கூட்டத்தில் பங்கேற்ற தெலுங்கு தேசம் கட்சி எம்எல்ஏக்கள் கடும் அமளியில் ஈடுபட்டனர். இதையடுத்து அக்கட்சி எம்எல்ஏக்கள் அனைவரும் சஸ்பெண்ட் செய்யப்பட்டனர்.
இந்நிலையில் சந்திரபாபு நாயுடுவை காவலில் எடுத்து விசாரிக்க அனுமதிக் கோரி ஆந்திர சிஐடி போலீசார் லஞ்ச ஒழிப்பு சிறப்பு நீதிமன்றத்தில் மனுத்தாக்கல் செய்தனர். இந்த மனுவை நேற்று விசாரித்த சிறப்பு நீதிமன்றம் சந்திரபாபு நாயுடுவை 2 நாள் சிஐடி காவலில் வைத்து விசாரிக்க அனுமதி வழங்கியுள்ளது.
மேலும் சந்திரபாபு நாயுடுவிடம் காலை 9.30 மணி முதல் மாலை 5 மணிக்குள் விசாரணை நடத்தி முடிக்கப்பட வேண்டும் என்றும் விசாரணையின் போது 2 வழக்கறிஞர்கள் வரை அனுமதிக்க வேண்டும் என்றும் சிறப்பு நீதிமன்றம் உத்தரவிட்டுள்ளது. சந்திரபாபு நாயுடுவை ஒரு வாரம் கஸ்டடியில் வைத்து விசாரிக்க சிஐடி போலீசார் அனுமதி கோரிய நிலையில் 2 நாட்கள் அனுமதி வழங்கப்பட்டுள்ளது.
மேலும் சந்திரபாபு நாயுடுவின் நீதிமன்றக் காவலையும் சிறப்பு நீதிமன்றம் 2 நாட்கள் நீட்டிப்பு செய்து உத்தரவிட்டுள்ளது. நேற்றுடன் சந்திரபாபு நாயுடுவின் நீதிமன்ற காவல் நிறைவடைய இருந்த நிலையில் மேலும் 2 நாட்களுக்கு அவருடைய நீதிமன்ற காவல் நீட்டிக்கப்பட்டுள்ளது.
சந்திரபாபு நாயுடுவுக்கு போலீஸ் கஸ்டடி வழங்கப்பட்ட சம்பவம் ஆந்திராவில் பெரும் பரபரப்பை ஏற்படுத்தியுள்ளது. இதனிடையே தன் மீதான வழக்கை ரத்து செய்யக்கோரி சந்திரபாபு நாயுடு தொடர்ந்த வழக்கின் விசாரணையை சென்னை உயர்நீதிமன்றம் வரும் 25 ஆம் தேதிக்கு ஒத்திவைத்துள்ளது.